Desde 2011 AVP ta papia di Gas Unie y awe 10 aña despues ainda ta jora
Parlamentario Endy Croes a scucha Marlon Sneek e Lider di Faccion di AVP den nomber di Mike Eman ta critica Eagle LNG un proyecto di gas y ta jora manera un “baby cu a perde su chupon”. Marlon den su joradera ta splika cu AVP su vision tabata enfoka riba gas y cu e gobierno actual lo no kier a papia cu Gas Unie. Mesora nos a hasi un backround check pa valida Marlon Sneek su ponencia paso nos sa cu Mike Eman, AVP y sigur Marlon Sneek semper ta manipula y engaña pueblo. Nos lo splika lokual nos a constata.
Ata prueba cu desde 2011 AVP tabata bezig cu Gas Unie:
Por a tuma nota cu desde 2011 Mike Eman ta cu un storia gastando miyones di Utilities Aruba alrespecto Gas Unie Hulanda. Nos ta corda con e Lider di Marlon Sneek di AVP a bula bay Venezuela pa purba firma un deal pa core un pipa di gas desde Venezuela pa Aruba. Un pipa cu presidente Maduro ora e lanta loko ta dal cos sera. Esaki tabata Mike Eman su vision. Adhunto prueba di publicasion di maart 2011 unda Mike Eman mes ta gaba cu nan ta bezig cu Gas Unie. Con por ta posibel cu den 8 aña den gobernacion desde 2011 te nov 2017 AVP no por a logra net net nada alrespecto GAS? Nos por a scucha hopi storia cu amigonan di AVP cu tabata negosha tabata exigi porentahe(%) pa nan propio saco. Esaki por tabata un di e obstaculo sigur. Rekmento di ciboyo interno den partido di Marlon Sneek enbes di buska bienestar general di pais. Awe Marlon Sneek ta grita manera alma malo cu Promer Minister no kier sinta cu Gas Unie. Mentira flagrante.
Promer Minister a logra cu Eagle LNG den menos di 6 luna:
Lokual Mike Eman y AVP no a logra desde Maart 2011 den 8 aña, Promer Minister Evelyn Wever Croes ta logrando den apenas 6 luna. Desde cu a logra kibra e contracto cruel cu CITGO na April 2020 a inicia e proceso di REOI 1 y 2. Final di Juli 2020 a habri envelopnan hunto cu Notaris. Pa December 2020 a firma LOI y Januari 2021 RDA a logra firma un Exclusivity Contract cu Eagle LNG . Pues na un manera rapido nos ta progresando. Eagle LNG tin un business model specifica pa area di Caribe. Aruba tin beneficionan na cantidad. Lo tin terminal pa exporta LNG pa otro islanan, lo bin cu un Bunkerstation pa tank barconan y Cruiseships cual tur ta tranformando pa core riba gas den futuro cercano. Si Refeneria bira realidad esaki lo bay core limpi riba gas unda Eagle LNG lo supply esaki y klaro den futuro WEB tambe por switch pa gas unda lo garantisa prijs mas barata pa proximo 20 añanan. Kiko ta e dolor di Marlon Sneek contra e compania aki? Kiko ta e dolor di AVP contra e compania aki of pa bay over na gas? Un cos ta sigur esaki ta un proyecto hopi bunita cu lo garantisa inversion, empleo, stabilidad den utilidad pa Aruba pa hopi aña. Banda di esaki lo cumpli parcialmente cu e acuerdo di Paris pa minimalisa emision di CO2. Marlon Sneek stop ta egoista pero bin bij. Aruba no ta di AVP y Marlon Sneek.Cu pasenshi y perseverancia nos lo mira e proyecto aki bira realidad.
