ORANJESTAD,Aruba
Parlamentario Endy Croes durante conferencia di prensa semanal di Fraccion di MEP a ilustra un documento cual porcierto ta e Ley di iniciativa cu lo wordo entrega dentro di poco na Parlamento pa haci cambionan den e Ley AB 1988 no 23 Motorrijtuig en motorbootbelasting verordening. Manera ta conoci AVP y Mike Eman na aña 2016 a cambia e ley aki. E solo motibo tabata pa haya placa mas liher y suta pueblo cu boetnan haltisimo na un manera cruel. Mike Eman tabata tin mester di placa pa entre otro paga su fiesta riba e famoso brug y pa cumpli cu Horizon Consultancy di Richard Arends kende a cobra rond di 4 miyon florin. Na manera scondi a cambia e ley aki mey anochi pa strangula e pueblo inocente.
Cambionan na fabor di pueblo
Por a tuma nota di e angustia cu pueblo a pasa aden den e prome siman di januari, pero gracias na e maneho humano manteniendo e hende central Minister Xiomara Maduro a pone su oido na curason di pueblo y a hala e fecha di pago pa 28 di februari. Parlamentario Endy Croes a bisa cu mesora nan a reuni internamente como Fraccion y a prepara pa un ley di iniciativa cu algun cambio na fabor di pueblo. Artikel 8 lid 3 y 4 lo wordo cambia. Fecha cu awor ta stipula 31 di januari como deadline desde 2021 lo ta 15 di februari. Nos kier tene cuenta cu nos pensionadonan y hustamente nan tabata cay den un buraco como cu 31 di januari nan placa no a pasa ainda. E cambio aki lo trece un alivio sigur pa e mas di 20.000 pensionadonan. Pagonan cu AVP a cambia pa 2 termino lo wordo cambia bek pa 4 termino esta por paga pa kwartaal. Artikel 8a lid 2 cual AVP y Mike Eman a cambia na 2016 cual awor ta stipula “de boete van ten hoogste 100%” lo wordo cambia y den e ley nobo esaki lo wordo stipula “boete van ten hoogste 25%”. Esaki ta significa cu si bo paga un kwartaal laat mas op menos Afl. 18.75 extra lo mester paga di boet.
Ta kico pueblo a haci Mike Eman?
Tin biaha bo ta puntra bo mes ta kico pueblo a haci Mike Eman y AVP? Dicon mester a cambia tanto ley asina na un manera scondi hustamente contra interes di pueblo? Con e Parlamentarionan di AVP por tabata asina cruel? Awe pueblo conoce nan. Awe pueblo sa ken ta ken. Awe pueblo por compara entre esnan cu a abusa di pueblo (AVP) y esnan cu si ta traha cu amor y oido na curason di pueblo. Parlamentario Endy Croes ta splica cu e Ley di iniciativa cu e cambionan aki ta cla pa cuminsa cana su trayecto y asina cu e yega Parlamento bek e lo wordo trata den un reunion publico pa un aprobacion final. Parlamentario Endy Croes ta anticipa cu e lo no asombra si AVP bolbe vota contra. Un cos ta sigur cu desde januari 2021 no lo tin e problematica di plachi number di auto mas y pueblo por habri aña trankil.
