Parlamentario Endy Croes: IPKO 2021 ta na Bonaire Diadomingo a inicia reunion Tripartid entre Aruba, Corsow y St Maarten

Parlamentario Endy Croes a splika cu un Delegacion di Aruba a sali fin di siman pa Bonaire unda lo bay atende varios reunion. Manera ta conosi cu reunionnan di IPKO ( Interparlamentar Koninkrijksoverleg) ta tuma lugar (2) ves pa aña. Na luna di Januari cada isla ta organisa esaki. Pues un aña Aruba despues Curacao y despues St Maarten y asina e ta keda rotando. E di dos reunion di IPKO semper ta tuma lugar mei mei di aña na Den Haag. Durante Pandemia a cancela algun reunion y otronan a bay virtual. Hulanda na su turno a escohe pa prepara y organisa reunion di IPKO na Bonaire pa cu aña 2021. 

/// Aruba – Curacao y St Maarten ta inicia cu un Tripartid:

Un dia promer cu e programa di IPKO cuminsa oficialmente Aruba, Curacao y St Maarten ta topa otro den un reunion di Tripartid. Pues Diadomingo 22 di Augustus desde 930am di mainta te cu 5pm atardi tin un programa bastante extenso unda Parlamentarionan di e islanan Aruba, Curacao y St Maarten lo reuni riba varios topico di interes comun di e islanan anticipando tambe algun puntonan importante cu lo wordo trata mas den siman momento e reunionnan di IPKO inicia. Temanan manera geschillenregeling lo ta riba agenda bek den un bachi nobo. Sigur temanan manera COHO y Landspaketten tambe ta riba agenda. Un tema interesante riba agenda ta mensenrecht. Asina tin varios temanan comun pero tambe topico cual kisas ta di interes pa un isla si y kisas e otro isla no pero lo wordo trata pa asina tur partners por compronde e tematica y  brinda sosten na tur isla momento nan presenta esakinan. Pues anticipando IPKO ta aranca diadomingo cu un programa pisa den un Tripartid mientras IPKO mes lo inicia dialuna 25 di Augustus y lo termina diaranson 25 di Augustus. Parlamentario Endy Croes ta splika cu Aruba por conta sigur cu den Fraccion di MEP Aruba lo ta dignamente y bon representa. Sinembargo ta un delegacion completo cu representante di tur Fracion ta na Bonaire y den caso asina enfoke ta pa mantene Delegacion di Aruba riba tur punto den union cu mesun vision bringando pa e bienestar general di henter pais. Asina semper ta logra mas. MEP como e Fraccion mas grandi liderando e Delegacion aki lo percura pa esaki resalta tambe Parlamentario Croes ta termina bisando.