ORANJESTAD, Aruba
Parlamentario Endy Croes ta duna poko mas splikacion alrespecto e contracto di Citgo. Den e siman(nan) binidero lo mester trata un ley den Parlamento pa duna apoderacion nan 3 minister esta Minister Presidente Evelyn Wever Croes, Minister di Financien Xiomara Maduro y Minister di Infrastructura Marisol Lopez Tromp pa nan por firma e “Terminantion Agreement” y asina finalmente termina e contracto cu CITGO y haña e jabinan di refineria y terminal legalmente den man di Gobierno/RDA pa asina por sinta cu otro interesadonan y scucha y sondea tur ideanan cu lo por wordo presenta.
Gobierno Anterior No a firma cu CITGO Petroleum Corporation (CPC):
Parlamentario Endy Croes a tuma nota cu entre otro Mike de Meza y Richard Arends a cuminsa cuestiona den media alrespecto e “Termination Agreement” y ta splika cu CITGO Petroluem Corporation ( CPC) si tin suficiente plaka. Parlamentario Endy Croes ta puntra mesora dicon Mike Eman, Mike de Meza y Richard Arends no a firma e contracto cu CITGO Petroleum Corporation anto? Ta masha hopi wega a wordo hunga den tur e asunto di CITGO aki. Den henter e inleiding di e Memorie van Toelichting di e Ley di 29 September 2016 Mike Eman a splika cu CITGO Petroleum Corporation Inc lo ta esun cu lo exploita e Refineria y e Terminal na Aruba. Despues cu nan a elogia CITGO Petroleum Corporation Inc asina hopi como un compania grandi y renombra, Mike Eman, Mike de Meza, Richard Arends y gobierno ta bira sera contractonan cu, a.) CITGO Aruba Holding, b.) CITGO Aruba Refining N.V. y c.) CITGO Aruba Terminal N.V. Pues 3 compania chiquito den mundo di petrolio practikamente sin fondo. Con e structura ta hinka den otro? E compania madre di e dos companianan CITGO Aruba Refining N.V. ( kende lo expoita e Refineria) y CITGO Aruba Terminal N.V. ( kende lo expoita e Terminal) ta CITGO Aruba Holding N.V. Akinan e laso di companianan a caba tambe. Pues CITGO Petroluem Corporation Inc (CPC) ningun momento NO ta MOEDER of ( MAMA) di CITGO Aruba Holding N.V. Pero ta solamente un manager.
CITGO Petroleum Corporation ta un Manager cu Service Agreement:
Parlamentario Endy Croes ta splika ta aki e wega a wordo hunga te hasta den e Memorie van Toelichting di e Ley LV voorzieningen heropening oliereffinaderij AB 2016 no 50 di 29 di september 2016. Despues cu Mike a gaba CITGO Petroleum Corporation INC den e Memorie van Toelichting asina tanto,(mesun compania cu awe Mike de Meza y AVP ta bisa cu tin plaka), na un manera “opzettelijk” willens en wetens ta coopera pa CITGO Petroleum Corporation Inc ( CPC) bira solamente un Manager permitiendo CPC sera un “Service Agreement” cu su mesun tres companianan chiquito pa cu nan management. Pues CITGO Petroleum Corporation Inc ta keda solamente un management company y no ta carga NINGUN pero NINGUN RESPONSABILIDAD di cualkier incumplimento di e obligacionnan di e contractnan. Unico responsabilidad cu CPC ta carga mediante e construcion aki ta pa “chica” e tres companianan ariba menciona cu management fee masha halto y saca tur e placa.
Dicon Gobierno di Mike Eman no a firma cu CITGO Petroleum Corporation Inc?
E pregunta mas cardinal cual kisas Parlamentarionan di AVP manera Richard Arends y Mike de Meza por contesta den e proximo reunion momento trata e Termination Agreement di CITGO ta dicon gobierno di AVP no a firma e contracto cu CITGO Petroleum Corporation Inc ( CPC) siendo un compania “kapitaalkrachtig” cu tanto nan mes a gaba den e Memorie van Toelichting y laga e compania grandi y reconosi aki para responsabel y duna e GARANTIA pa cumplimento cu su obligacionnan den e contracto Definitive Participation Agreement? Part 2 lo continua. Marlon Sneek no ta compronde e materia.
