Parlamentario Endy Croes a splika cu un carta a sali pa gobierno cu e deseo pa e wordo trata den proximo Ministeraad durante e siman aki ainda. Parlamentario Endy Croes a comenta cu E ta contento cu Fraccion di MEP den totalidad ta sostene e peticion aki. E carta a sali y ta spera gobierno considera esaki.
Pidiendo compresion pa Taxista, Autobus y demas haña FASE:
Di acuerdo cu e maneho cual ta un maneho rigido cu un control pisa di entre otro CAD, gobierno actualmente ta dunando FASE solamente na personanan kendenan a perde trabou desde 13 di Maart enadelante y pues cu por prueba un carta di doño di trabou cu nan a perde trabou debi na Covid 19 y alaves mester un prueba di nan salarisslip. Banda di esaki ZZP ta esnan cu ta traha y nan mes como unico empleado di nan propio negoshi inscribi na Kamer van Koophandel como eenmanzak kendenan tambe ta bin na remarke. Manera Taxi, Autobus, rebendedornan di Lotto pa nombra un paar. Banda di esaki esnan di ZZP mester por prueba cu promer cu Covid 19 esta lunanan di Januari y Februari 2020 nan tabata pagando BBO. Esnan cu no por a prueba esaki di acuerdo cu e maneho NO a bin na remarke pa e ayudo di FASE.
Peticion di Fin di aña pa yuda e famia como cu e hende ta central:
Parlamentario Endy Croes a splika cu berdad esnan cu no tabata pagando BBO desde April enadelante no a bin na remarke pa e ayudo. Sinembargo awe despues di 8 luna di Covid 19 ta comprendibel cu Covid a dal e ser humano mes duro. Tanto esnan cu SI a cumpli pero tambe esnan cu NO a cumpli cu BBO. Como ser humando Parlamentario Endy Croes ta kere cu E hende mester di ayudo. Den e contexto aki yegando fin di aña ta pidi gobierno tanto Minister Glenbert Croes y Minister Xiomara Maduro pa considera e carta aki fuertemente y ban brinda e ayudo na e ser humano den nesecidad. Famianan ta pasando duro y fin di aña pa tradicion esaki ta dal nos tur mas duro. Fraccion di MEP no ta pidi pa kibra ningun ley tampoko pa bypass ningun maneho sino pa ahusta e maneho den cuadro di ley cu argumentonan alcaso cu e vision cu e ser humano ta central. Covid a dal nos tur y no ta destingui ken si a paga BBO of kende no a paga BBO. Awor nos tur ta mas consiente y gobierno sa precies kendenan a cumpli of no y esaki ta un les pa nos tur pa futuro tambe pa cumpli cu Bo pais y Bo responsabilidadnan como debe ser. Ban spera cu nos haña oido na gobierno pa esnan cu a aplika como ZZP’rs pa nan tambe por bin na remarke pa e proximo FASE. Nos trabou ta pa scucha pueblo y trata na trese solucion pa esnan den dolor. Hunto nos lo logra!
