Parlamentario Endy Croes ta splika cu aña 2020 a resulta di ta un aña devastador pa Aruba causa door di e Covid 19. Sinembargo esaki no tabata pa Aruba solamente pero pa henter mundo y e impacto tabata pa uno mas fuerte cu e otro.
/// Eagle LNG cu e mihor business model pa Caribe:
E compania Americano Eagle LNG kende a firma un LOI cu RDA/Gobierno recientemente ta un compania cu a desiña un modelo di negoshi pa Caribe cu ta hasi cu nan prijs ta insuperabel. Pa cuminsa nan manera di transporta Liquid LNG den barconan “no” mucho grandi pero desiña pa rutanan den Caribe ta hasi nan asina competitivo. Supongamos cu ta e barconan grandi cu ta bay por ehempel Europa of ASIA mester a pasa yena algun tanki cu Liquid LNG na Aruba lo hasi e prijs mas caro como cu e volume di Aruba no ta un volume manera di paisnan grandi. Awor cu un business model enfoka pa region di Caribe cu barconan special pa e rutanan aki a bolter tur scenario ta hasi e proyecto aki aun mucho mas atractivo.
/// Republica Dominicana, Jamaica y Puerto Rico a bay riba gas:
Paisnan manera Republica Dominicana, Jamaica (2 proyecto), y Puerto Rico ta entreotro paisnan den Cariba kendenan a “switch” pa LNG gas. Cada un depende di e proyecto a varia un poko den prijs pero tur a resulta den reducion den operacion pa traha coriente cual a desemoca den un reducion essencial pa henter nan comunidad den prijs di coriente y awa. Aruba tin den teblachi actualmente un oportunidad di “oro”. Pa esaki gobierno mester duna instrucion contundente di su vision pa bay over na gas cual mester haña oido di esnan encarga alinstante. Entre otro WEB mester habri negosacion directo cu e compania di Eagle LNG y no por laga nada stroba esaki. Si Aruba kier forma parti di esaki na un manera exitoso awor ta e momento. Consul USA ta para 100% tras di e proyecto aki y e compania Eagle LNG tin e fondonan nesesario pa por desaroya e proyecto aki cual tin un costo di alrededor 185 miyon us dollar. Finalmente importante ta cu prijs di LNG ta hopi stabiel y no ta fluctua manera HFO of Diesel, LNG ta un feed hopi limpi y asina WEB lo baha su emision di CO2 den aire kitando e problematica cu tin cu e Waf na Barcaders, alaves number tres WEB lo sa di baha prijs di awa y coriente cu minimo 20% pa hender comunidad. Parlamentario Endy Croes ta spera cu inteligencia lo prevalese y nos amor patria por guia tur esnan encarga pa cuminsa cu negosacionnan alinstante pa e bienestar general. Nos lo bay sigui esaki hopi di serca.
