Na Marisol Lopez Tromp e egocentrico marisol
Den BON DIA ARUBA di 8 di Mei 2021 riba pagina A4 nos por lesa cu Marisol Lopez-Tromp a bisa lo siguiente: “E situacion cu POR a culminá despues di como Minister Marisol a expone casonan di corupcion cu ela topa cune. Y en bes cu a sostene Marisol su coleganan Minister, incluso Prome Minister y Parlamento, a actua contra ley pa core cu Marisol. Un di e motibonan pakiko tin deterioro den e pais aki ta pa motibo di corupcion den aparato publico. Y ta esey Marisol a purba drecha. Pa e motibo ey a baha Marisol, den un procedura contra ley, cu sosten di fraccionnan den Parlamento, sosteni pa tur Minister cu awor ta demisionario.” Te aki e declaracion di Marisol Lopez-Tromp como lider di MAS.
/// Segun Marisol cu el a wordo baha contra ley, que tristeza: Cu e ponencia segun Marisol cu coleganan Minister, incluso Prome Minister y Parlamento a actua contra ley pa core cu Marisol y cu a baha Marisol den un procedura contra ley cu sosten di fraccionnan den Parlamento, sosteni pa tur Minister cu awor ta demisionario. Atrobe Parlamentario Croes ta tuma nota cu Marisol NO ta papia berdad. E procedura den Parlamento encuanto e mocion di desconfianza cu a wordu sostene door di e fraccionnan di e coalicion, di cual Marisol tawata forma parti no a yega na e bahamento di Marisol como Minister pa rasonnan conosi y discusionnan cu ya a debati riba dije aunke su propio fraccion a vota contra dije y a lage cay. Pues Marisol NO a wordo baha pa y den Parlamento.
/// E motibo berdadero cu a manda Marisol cas: E motibo berdadero cu a baha Marisol como Minister ta cu Marisol den un reunion di Conseho di Minister den cual e tawata presente Marisol a bai di acuerdo cu un decision di Conseho di Minister encuanto un solucion pa e problema di spearfishing, pero despues a nenga di ehecutá tal decision. Legalmente Marisol como individual por keda sin ehecutá un decision cu a wordu tuma door di Conseho di Minister, pero actuando asina tin como consecuencia cu e mester entrega su retiro como Minister, ya cu ela actua empugna cu un decision di Conseho di Minister. Comokiera cu Marisol no obstante su actuacion contra decision di Conseho di Minister a nenga tambe di entregá su retiro como Minister, Gobierno di Aruba a hanjele obliga di retirele como tal mediante un decreto firma pa Gobernador. E retiro aki a tuma lugar completamente di acuerdo cu ley y democracia basa riba custumbernan constitucional. Marisol mester stop di hunga victima y accepta cu su retiro como Minister ta e mes a ocasionele door di actua contra un decision di Conseho di Minister. Marisol mester sinja papia e berdad y stop di ganja. Pa e por bira lider di MAS Marisol a ganja cu ela wordu baha como Minister pasobra semper ela para contra actonan coruptivo, lubidando su fechorianan den entregamento terrenonan di Pais Aruba na e.o. su sponsor principal Maurice Neme q.e.p.d.. Promer cu e mentira aki cu semper ela para contra corupcion, Marisol a ganja cu e ex-Presidente di Parlamento a dal e un mokete den sala di Staten y awor e ta ganja atrobe cu Parlamento a bahele como Minister den un procedura contra ley. Ta kende por tin confianza mas den e credibilidad di Marisol den su funcion di lider di partido MAS, su di cuater Partido. Ainda Marisol kier pretende cu e tres partidonan MEP, AVP y POR cu a corre cunele a actua incorrecto y cu ta e so tin razon ? Marisol no solamente ta un mentiroso patalogico y un persona egocentrico, pero tambe un persona cu un actuacion excelente cu ela sinja na Mascaruba.