ORANJESTAD, Aruba
Parlamentario Endy Croes bastante indigna cu e astucia di Mike Eman lider di AVP e partido cu a masacra e finansas publico di pais Aruba den apenas 8 aña cu pueblo a confianan. Ta manera a confia pushi cu piska!
/// AVP a redobla e debe nacional di 43% pa 93%:
Desde cu Aruba a haña su Status Aparte na 1986 Aruba a progresa enorme como pais. Desaroyonan economico tabata obvio. Den e promer 23 aña di Status Aparte desde 1986 pa 30 di October 2009, momento cu MEP a baha y AVP a take over gobernacion e debe nacional di Pais Aruba tabata 43%. IMF den nan recomendacion ta usa un “debth anchor” di 55% pa islanan. Pues debe nacional di Aruba den tur sentido tabata bou di control. Esaki tabata inclusivo 200 miyon dollar cu Aruba mester a paga pa projectonan fantasma di AVP ( Henny Eman e tempo aya) di hotelnan Italiano. Si no tabata pa esaki e debe nacional lo tabata mucho mas abou. Desde Mike Eman y AVP a drenta na mando 31 di october 2009 pa 17 di November 2017 esta den 8 aña di tempo nan a percura pa redobla e debe di pais Aruba mandando esaki na 93%. Un Pais casi bancarota. Esaki tabata e ragaldo di Mike Eman y AVP pa nos baranca tan stima. Un Mega Debe cual awe tin nos ta mendiga na Hulanda pa ayudo. Si no tabata pa e maneho desastroso y sin gevoel di Mike Eman y AVP awe Aruba lo ta mucho mas mihor para riba su propio pia y por a surpasa e crisis aki nos mes. Esaki ta e tristo berdad y realidad cu nos ta bibando aden. Spera cu pueblo sa di condena AVP di tal forma pa nunka pero nunka mas nan goberna e pais aki.
/// E lucha ta Sagrado:
Consecuentemente Mike Eman y AVP a hinka Aruba den un skina practikamente sin salida. Awor cu Corona Crisis a bati na porta esaki ta manera e klabo riba e caha. E lucha sagrado di Betico Croes y MEP sosteni pa henter e pueblo den añanan 70 y 80 awor hasta temporalmente ta na peliger. Nos no mag di lubida e lucha unda homber y muhernan balente e tempo aya a bringa sin barera sacrificando nan mes pa nos futuro generacion. Augustus Scur, marcha di flambew, riot commando a tira riba pueblo y drenta cas di diferente hende, Betico a wordo tira pa un agente policia, Betico a wordo benta den prison inhustamente ta entre otro facetanan di e lucha, nos bandera, nos himno ta entre otro a forma parti di e causa. Status Aparte a percura pa un desaroyo economico substancial. Awe cu hopi dolor nos ta drentando un pagina scur den historia di Aruba y ta bringando ainda pa reskata y buska e balance den e ajudo cu nos mester. Aruba y Hulanda practikamente kier mesun cos pero e caminda pa jega Roma ta diferente. Laga sano huicio prevalese pa hunto nos sali afor cu e mihor producto pa e bienestar general di henter nos pueblo.
