Parlamentario Endy Croes a amplia riba un parti di e ley cu a wordo aproba dialuna ultimo den Parlamento. Ta trata di “inwerktreding” di un cantidad di cambionan den Burgerlijk Wetboek. A hasi centenares di cambio na masha hopi articulo cualnan a wordo modernisa pa asina nos leynan ta den concordancia cu leynan den Reino. Un di e cambionan humilde pa proteha e homber chiquito ta e siguiente cambio.
Beslag maximo a wordo reduci di 33.3% pa 10%:
Un doño di trabou por wordo obliga pa retene un porcentahe di salaris di un empleado. Esaki ta conosi como “Beslag onder de Werkgever”. E maximo beslag actualmente ta 33.3% articulo 7A:1614g Burgelijk Wetboek Aruba (BWA). Momento e homber humilde tin un of otro debe y pa cualkier rason no por a sigui cumpli, un compania(of cuidadano) por usa e canalnan legal pa pone beslag riba salario di esun cu debe. Normalmente e doño di trabou den un caso asina ta wordo obliga pa ley pa retene 33.3% esta un tercera parti di salaris di e empleado. Por ehempel si pone beslag riba salaris di e homber chiquito cu tin un salaris serca di un minimum loon di Afl.1800,- , e doño di trabou mester retene Afl.600 florin y lo paga e homber chiquito solamente Afl. 1200 pa luna. Esaki sigur ta inhusto. Awor cu a hasi e cambio a logra reparti esaki den 3 categoria ancra den ley. E doño di trabou di e homber chiquito por retene solamente 10% maximo di e salario di e homber chiquito manera e ley drenta na vigor. Por ehempel di un sueldo di Afl 1800 florin pa luna por retene solamente Afl.180,- y e homber chiquito lo bay cas cu Afl. 1620,- . Esaki sigur ta un trato husto saliendo di e punto di bista cu e hende ta central.
Kiko e ley ta ensera?:
Den articulo 7:632a nobo di e Codigo Civil a hasi cambio unda a crea 3 categoria cu 3 diferente maximo ( plafond) pa beslag regeling pa cu salario di empleado. Si empleado ta gana salario minimo , e beslag maximo ta 10% di e salaris netto enbes di 33.3% cu e tabata ta antes. Si empleado tin un salaris maximo di Afl.50.000 pa aña e beslag maximo ta 25% di e netto salaris. Si empleado tin un salaris di mas cu Afl.50.000 pa aña e beslag maximo ta 33%. Asina a splika awe un parti chiquito den e tantisimo cambionan cu a wordo cristalisa momento a aproba e ley dialuna ultimo.
