Parlamentario Endy Croes a keda hopi desapunta despues di scucha Mike Eman diripiente den prensa siman pasa despues di 3 aña di ausencia. Mike Eman a yora durante algun minuut cu AVP tin e solucion pa cu e efectonan di Pandemia aki. Mas tristo ta cu Mike Eman ainda a convense algun aliado pa bay sinta den Renaissance Hotel pa aparenta cu nan lo tin e solucion. Tristo pa mira hendenan prepara cu mester compronde bon bon kiko AVP a hasi cu e pida baranca aki sinta na mesa cu e destructor di Aruba. Hende sa come lubida!
Mike Eman y AVP a kibra nos Pais Aruba:
Destructor di Pais Aruba tin nomber y faam esta Mike Eman y AVP. Tur rapport di instancianan proficionalnan a ilustra esaki hopi kla. Den rapport di IMF tin ancra cu un isla manera Aruba no por surpasa un Debe Nacional di 55% y a ilustra esaki como e “depth anchor” di 55%. Desde Status Aparte (1986) te cu October (2009) pues despues di 23 aña di Status Aparte tur gobiernonan hunto a mantene e debe nacional di Aruba bou di e “depth anchor” stipula pa IMF esta bou di 55%. Pa ta exacto na October 2009 momento cu MEP a bandona gobierno esaki tabata na 43%. Pues den cuadro di tur normalidad. Kiko a pasa despues? Mike Eman y AVP a drenta manera “wild wild west” y a cuminsa derocha plaka manera cu ta fin di mundo. November 2017 Mike y AVP a laga un debe nacional atras di 93% pues AVP a mas cu redobla e debe di pais Aruba. Esaki ta e dolor cu nos ta bibando awe aden. Pa e rasonnan aki Aruba no tin “shoks” pa por traspasa e pandemia aki riba su propio forsa. Nos no por lubida e desaster financiero y Mega Debe cu Mike Eman y AVP a causa hamas kibrando nos pais na finigrana.
A redobla Interes di Pais Aruba:
Prohibi pa lubida cu bou di e maneho di regimen Mike Eman y AVP a redobla den mesun temporada ariba menciona e interes di pais. A presta plaka rond mundo pa pueblo paga sin importa na ki interes basta nan por a haña plaka presta y djodjo. Aruba durante aña 2019 a paga 232 miyon solamente na interes riba plaka cu AVP a presta den 8 aña. Esaki ta igual na 635 mil florin pa cada dia esta 365 dia pa aña. Burdugonan cu a causa tur esaki awe kier ple SALVADOR di Aruba y kier bin cu plan? Ta mesun Mike Eman y AVP a mara Aruba na proyectonan PPP di cual pueblo mester paga 82.4 miyon florin pa 20 aña largo te na 2037. Ta mesun lunatico aki a regala Speed y Patrick Paskel entre otro compania Tera Group y Paxi mas di 7 miyon florin na propaganda pa papia bon di gobierno. Abogado Sjiemfat tambe a cobra 5.3 miyon na tur sorto di advies. Richard Arends y su Horizon Consultancy un otro 4 miyon pa conseha Mike Eman. Anto hendenan manera Patrick Paskel kier yora awe contra un gobierno cu ta bringando dos crisis? Crisis AVP y Crisis causa pa e Pandemia Mundial. Parlamentario Endy Croes ta termina bisando cu rato rato mester recorda pueblo di e bandidonan cu a causa e desaster cu awe Aruba ta bibando aden. Banda di tur e dolornan aki nos lo keda mira e parti positivo y ta sigur cu lo sa di saca Aruba for di e debacle nunka bisto den nos historia. Noticianan alentador lo ta na caminda den simannan nos dilanti.
