ORANJESTAD,Aruba
Parlamentario Endy Croes ta haci un invitacion na henter pueblo di Aruba pa ban celebra dia di Betico en grande. Dia 24 anochi na Plaza Libertador Betico Croes riba e anochi cultural. Y dia 25 mainta na e acto protocolar mientras tin actividadnan na diferente lugar rond Aruba. Betico Croes, un visionario y luchador incansabel. Betico, un homber senciyo y hende di tur hende naci na Sta Cruz dia 25 di januari 1938. Si Betico tabata na bida diasabra awor Betico lo a cumpli e bunita edad di 82 aña.
Betico a funda MEP (Movimiento Electoral di Pueblo) dia 9 di februari 1971. Otro aña MEP lo cumpli 50 aña. Betico como meneer di school a duna les na Colegio San Hose y Colegio San Antonio na Sta Cruz. Betico, un persona hopi social kende tabata gusta musica y deporte. Betico tabata dirigente di Koor di Sta Cruz, Betico tabata toca acordeon y tabata tin e famoso “Betico y su Grupo” cual despues cu el a fayece a bira “Grupo di Betico”. Banda di esaki Betico tabata gusta deporte y tabata un tremendo hungador di ping pong.
Betico su lucha pa Status Aparte a intensifica momento cu el a funda partido MEP. Den e himno di MEP por scucha e letranan manera “cu hunto nos lo logra pa tur e Status Apart” y tambe “kibra e cadena di esclavitud pa nos dushi Aruba ser salba”. Pues den e himno a ancra e tono di e lucha pa libera Aruba. Aruba mester ta baas den su propio cas. Betico a hiba un lucha tenaz. Betico a percura pa unifica e pueblo y a bin cu e Himno, Bandera y Ortografia di Aruba.Tur esakinan ta simbolonan cu ta haci un pueblo sinti hopi orguyoso.
Betico, hende di tur hende tabata bishita tur hende den tur skina di Aruba y a logra gana nan sosten dia 11 di augustus 1977. Fecha riba cual nos ta recorda Augustus Scur como parti di e lucha. Den pueblo tabata tin un truck (flatbom) hopi popular cual tabata bishita barionan cu musicanan di MEP y di Betico hibando e mensahe di Status Aparte rond Aruba. E truck aki tabata wordo identifica cu e famoso nomber “Barco di Libertad”.
Dia 12 di maart 1983 Betico a logra convence Hulanda unda Aruba a haya su Status Aparte desde 1 di januari 1986. Betico un luna despues di dia 24 di april 1983 den porta di eleccion tabata saludando su pueblo riba jeep cu su ruman Aiky Croes na wiel, a drenta veld di Winston (Awe conoci bou di e nomber Veld di Nadi Croes y Crismo Angela) y a wordo tira pa un polis casi fatalmente. Betico mester a wordo hiba urgentemente cu air ambulance pa Miami. Betico un siman despues 29 di april 1983 durante eleccion di Eilandsraad a logra haya un total di 10506 voto riba su nomber personal cual te awe ta un record. Esaki a ilustra e stimacion cu pueblo tabata tin pa Betico.
Sinembargo 2 aña despues cu Betico a recupera pa continua cu e lucha, Betico ta accidenta na Sta Cruz dia 31 di december 1985 net 3 ora promer cu Aña Nobo esta 1 di januari 1986 y a bay den coma pa 11 luna y despues a fayece na Utrecht, Hulanda dia 26 di november 1986. Pues tur e lucha cu Betico a hiba cu su pasion y amor pa libera Aruba cual el a logra tambe pero nunca Betico mes por a biba pa mira su soño bira realidad. Den un speech hopi conmovedor na november 1985 Betico a bisa “Mi ta un tata particular. Mi no ta un tata pa un famia chikito di un homber, muher y 4 yiu pero mi ta un tata pa un famia grandi, henter e pueblo di Aruba.” Danki na Dje cu awe Aruba tin su Status Aparte y ta liber unda Aruba tin su propio Minister Presidente, Ministernan, Himno, Bandera, Ortografia, Moneda, Banco Central pa nombra algun. Laga nos tene memoria di Betico bibo y sali celebra 25 di januari awor, Dia di Betico. Danki Betico.
