ORANJESTAD, Aruba
Parlamentario Endy Croes ta splika cu diabierna ultimo Fraccion di MEP a manda un total di 16 carta pa tur Fractie Voorzitter di 16 Fraccion den Tweede Kamer. Carta aki wordo firma pa Rocco Tjion Fractievoorzietter di MEP y Endy Croes vice- Fractievoorzitter di MEP representando henter e Fraccion y sigur achterbaan di partido.
/// A pidi Fraccionnan den Tweede Kamer pa pidi voorlichting:
Normalmente momento un ley den concepto wordo presenta na Tweede Kamer, Raad van State ta hasi un “voorlichting” y asina ta sondea si e ley aki ta cuadra den tur aspectonan legal, si e no ta contra Statuut y si e proceso y proceduranan a cana corecto y ta duna nan advies. Pa lokual ta e (2) Rijkswetten presenta pa Militair Knops ta proba cu esaki no a cana e caminda corecto pa un “Consensus”, no tin consesus ainda. Militair Knops a presenta e leynan aki eenzijdig sin a discuti cu e islanan y alaves e Rijkswetten primordialmente riba e Entiteit ta boks masha hopi cu leynan local di islanan unda Hulanda den un forma silencioso ta traspasa basta autoridad pa Hulanda bou capa di e entiteit. Algo masha normal ta cu Raad van State ta hasi un “voorlichting” riba leynan cu wordo presenta. Aki tampoko Militair Knops no kier coopera. No a keda nos nada otro pa tanto via Parlamento manda pidi oficialmente Tweede Kamer pa un voorlichting. Tweede Kamer por pidi esaki. Nos mes no por manda pidi esaki. Fraccion di MEP banda di esaki diabierna ultimo a manda 16 carta pa 16 Fraccion di Tweede Kamer pidiendo nan pa hasi pregunta riba e (2) Rijkswetten nan aki y alaves pidiendo nan tambe pa solicita un “voorlichting” riba e proposicion concepto di leynan presenta door di Militair Knops.
/// D66 y PVDA a reaciona y dialuna 31 di Augustus a hasi pregunta:
Parlamentario Endy Croes ta splika cu D66 y PVDA a reaciona positivo riba e carta di Fraccion di MEP y mesora a manda un total di 15 pregunta oficial via Parlamento Hulandes pa Militair Knops. Entre otro a remarka lokual e Ombudsmannen di Hulanda, Curacao, St Maarten a trese dilanti cu e “short time” cu Militair Knops ta forza islanan pa tuma desicion y cumpli cu condicionnan. Tambe nan a remarka cu e condicion imponi lo traha negativo riba economia di e islanan cual lo desemboca den problemanan social hopi grandi. Otro precupacion di Ombudsmannen ta cu Rijkswetnan aki lo mina “budgetrecht” di e Parlamentonan. Pues banda di Hoge College van Staat manera Raad van Advies di Corsow kende a elabora amplio riba e materia y a desconseha totalmente pa acepta e Rijkswetten manera cu e ta awor. Tambe por a tuma nota di diferente otro Professornan Hulandes y experto riba e tema manera Hoogers y Kunneman tambe ta splika cu lokual Militair Knops y Hulanda ta hasiendo no ta corecto y contra ley. Pregunta ta keda si Militair Knops y Hulanda ta habri y dispuesto pa dialoga cu respect pa jega na solucionnan real y duradero pa islanan den Caribe. No ta e momento pa tin instabilidad awor mei mei den crisis. Ta di spera cu nos por sali afor na un manera decente tresiendo “rust” pa un gobierno por goberna y maneha e pais momento cu mas e pais mester di esaki.
