18 di Maart 1976 e bandera di Aruba a bay halto pa promer biaha
Parlamentario Endy Croes ta repasa historia di e bandera di Aruba. E siman aki dia 18 di maart Aruba ta celebra 45 aña di nos Himno y Bandera. Den un otro articulo recien a repasa historia di nos himno y awe lo dedica na historia y significasion di nos bandera. No por keda sin menciona cu e gran Libertador di Aruba Sr Betico Croes den e trayecto y su lucha pa realisa nos Status Aparte a sinti e nesecidad enorme pa unifica Aruba pa asina por cristalisa e soño y anhelo di henter e pueblo. Atravez di e balornan manera Himno y Bandera cu ta lanta e sentimento di orguyo di un pueblo y ta identifica nos como un nacion Betico a logra e union desea. E vision di Himno y Bandera a bira un realidad.
Pueblo a diseña 693 modelo pa un bandera:
Dia 21 di Januari 1976 Gobierno Insular a instala un Comision di Bandera y a inicia mesora cu tramitenan oficial pa organisa un concurso den pueblo pa un diseño di un bandera pa Aruba. Historia ta ilustra cu miembronan di e comision aki tabata ta Julio Maduro, Wouter van Romondt, Ronald Donk y como secretario Juan E. Wever. E Lider honorario di MEP kende pa 25 aña tabata Lider di MEP Sr.Nelson Oduber e tempo aya na 1976 tabata Diputado di Cultura encarga pa organisa ful e proceso aki y a defende e leynan pa Himno y Bandera cu exito den Eilandsraad. Gran mayoria di participante pa cu e concurso tabata muchanan di school. A logra ricibi 693 diseño total. Locual a resalta di e gran mayoria un strea di 4 punta, strepi horizontal of vertical y colornan blauw, geel, blanco y cora. Cu e informacion aki Aruba a busca ayudo di un compania proficional specialisa den bandera. Asina gobierno aserca Flag Research Institute na Boston USA. E compania aki cu e informacionnan cu a resalta den e 693 diseñonan a logra bin cu e concepto final.
Colornan di bandera di Aruba:
Tempo aya a escohe y a usa colornan di acuerdo cu e diccionario di color “British Colour Council Dictorionary of Colour Standard” ( BCC). E color original blauw di bandera di Aruba ta Larkspur, No 196 mihor conosi como U.N.Blue. E color geel ta Bunting Yellow, no 113 y e color cora ta Union Jack Red, no 210. Color blanco ta White,no 1. Tur a wordo saca for di e mesun diccionario (BCC). Awendia e dicho diccionario di color ( BCC) no ta existi mas. Conforme e centro di investigacion di bandera Flag Research Center na Merca, e colornan original ariba menciona ta igual na e guia di color di Pantone como lo siguiente. Colornan original blauw Larkspur no 196 U.N.Blue ta igual na blauw no 297, cora no 186, geel no 108 y blanco ta blanco absoluto.
Significasion di colornan di bandera di Aruba:
Blauw: Ta representa e lama cu ta rondona nos isla. Posicion di e Strea: Ta simbolisa e posicion di Aruba den lama Caribe. E Strea cora: Ta representa e pasion intenso di cada cuidadano pa su isla y e sanger cora di Indjannan cu a bringa pa nan libertad den Rooi Frances. Rand blanco di e strea: Ta simbolisa e santo blanco di nos playanan cu ta rondona nos isla y alavez e puresa di curason di nos hendenan cu ta respeta husticia, orden y libertad. E 4 puntanan di e Strea: Ta simbolisa direccionnan di compas indicando e diferente paisnan di unda hendenan a bini Aruba y forma un comunidad. Strepinan Geel: Ta simbolisa e color di ambundancia, solidez di ambundancia y fuente di ingreso di antaño manera industria di oro, guamo y di aloe. Alavez e geel ta simbolisa nos matanan manera kibrahacha, brasil, bonchi di strena, curahao, tuturuto y wanglo.
18 di Maart 1976 Bandera di Aruba a wordo lanta oficialmente:
Dia 16 di Maart 1976 Eilandsraad a aproba e diseño di e bandera oficialmente y dia 18 di Maart 1976 den Wilhemina Stadion awe ( Compleho Deportivo Guillermo Prospero Trinidad) a lanta e promer Bandera ofiicial di Aruba almismo momento resonando nos Himno oficialmente pa promer biaha. Historia aki ta pa nos traspasa pa nos juinan y jui di nos juinan y semper nos lo keda orguyoso di esnan cu a logra esaki. Pabien Aruba y ban Celebre!
