Tin 5 variante di COVID na Aruba, Britanico, Mexicano, California, Brazilero y di New York
Parlamentario Endy Croes a splica cu e por a sigui e update di Micro Biologo Dr Wilmer Salazar alrespecto e Corona Virus esta Covid 19 y variantenan. Dr. Salazar a amplia cu na Aruba almomento tin 5 variante di Corona.
Kiko ta definicion di un variante?:
Un variante ta momento un virus ta mutua esta e ta cambia su structura genetico y ta transforma su mes sea den un virus bon of un virus mas malo. Si e transforma pa un virus “bon” esaki kiermeen cu e virus ta perde capacidad di infecta ta hasi menos daño pues ta perde forsa. Si e cambia pa un virus mas “malo” esaki kiermeen e virus ta tuma tur materialnan genetico y ta bira mas contagioso y virulento pues mas agresivo.
Ta confirma cu na Aruba tin 5 variante:
Micro Biologo Dr Salazar a splica cu na Aruba actualmente tin 5 variante. Variante Britanico ta uno cu ta hopi contagioso pues ta pega masha liher y ta trese hopi complicasion cune y net e variante Britanico aki a detecta 50 caso na Aruba. E bon noticia ta cu e vacuna Pfizer cu Aruba ta usandso ta hopi efectivo contra e variante Britanico y ta limita cu e virus ta plama rond y ta mantene bou control. Pa e motibo aki ta importantisimo pa nos keda registra pa vacuna. Otro variantenan na Aruba ta e variante di Mexico tin 6 caso, variante di California tin 4 caso, variante Brasilero tin 1 caso y variante di Ney York tin 1 caso.
Israel a vacuna 60% di su poblacion:
Remarcabel ta ehempel di Israel cu a alcansa pa vacuna 60% di nan poblacion. Israel su poblacion ta alrededor di 8.7 miyon persona a logra vacuna rond di 5.2 miyon persona (60%) caba y ta na caminda pa logra un herd immunity. Israel a hasi un campaña masivo pa motiva e hendenan registra. Israel tambe ta usando e vacuna marca Pfizer y notable ta cu despues cu e hendenan a tuma e di dos “shot” di vacuna, Israel a nota cu e peak halto di contagio y di mortalidad a baha considerablemente of por bisa drasticamente. Esaki ta prueba cu e vacuna ta traha bon contra corona virus y e variante Britanico. Aruba tambe ta den e bon direcion y pesey laga nos ban sigui registra pa vacuna. Parlamentario Endy Croes ta termina cu un plegaria na pueblo. Ban vacuna pa nos ta proteha!
