Durante e programa radial “Interes di Pueblo” di diasabra ultimo, Parlamentario Edgard Vrolijk a elabora riba e ley di financiamento politico. Pa ley cada politico y cada partido politico mester raporta cuanto fondo nan a haya na donacion y na fundraising un aña prome cu eleccion. Mester a raporta den dos parti. E prome mester a wordo entrega na Conseho Electoral dos siman prome cu eleccion, y e di dos mester a wordo entrega dos siman despues di eleccion.
Meta di e ley no ta pa stroba politiconan, sino pa duna transparencia. Especialmente mirando cu den pasado nos a conoce e caso di Roberto Rincon, cu a haci donacion di $50 mil na Mike Eman pa su campaña y despues ora Mike Eman tabata den gobierno, Roberto Rincon a haya permiso y tereno na cantidad. Pa evita situacionnan asina, a bin cu e ley. E declaracionnan ta wordo publica riba e website di Conseho Electoral.
Partido MEP a cumpli cu e ley y a publica e total di placa cu a haya di donacion 8,551 florin y 220,510 fundraising na e diferente rifanan cu e partido a organisa den ultimo aña. Total partido MEP a genera 229.061 florin den ultimo aña pa por a cubri e gastonan di campaña.
Parlamentario Edgard Vrolijk a informa cu tur hende por mira cu partido AVP a declara cu a genera apenas69,509 florin na fondo.
Tur hende ta realisa cu 69 mil florin no tabata suficiente pa e campaña miyonario cu AVP a hiba. A hisa mas di 2000 bandera, como 4 banderana un cas y a paga habitantenan pa pega bandera na nan cas. Ta obvio cu e 69 mil florin ey no lo a cubri ni un kwart di e gastonan cu partido AVP a haci.
Aparte di esey lider di AVP Mike Eman a raporta cu e no a haya ningun cen na donacion ni na fundraising. Esey ta haci e declaracion di partido AVP aun mas irealistico!
KICO TA E CONSECUENCIA?
Ley ta stipula cu sibo no raporta tur donacion y fondorecauda, e comision di Conseho Electoral lo haciinvestigacion y porimpone un multa.
Haci declaracion falso ademas ta un hecho castigabel cu lo wordo investiga pa Ministerio Publico. Pues, e declaracion falso aki di partido AVP y di Mike Eman por tin consecuencianan hopi serio pa e partido y pa Mike Eman.