Dia 1 di october 2024 ta un dia di fiesta pa democracia na Aruba cu huramentacion di sra
Bryson como e prome Ombudsman di Aruba. Despues di decadas y como e ultimo pais den
Reino Aruba ta bay tin su Ombudsman. Entrante 1 october padilanti e Ombudsman lo hunga
un rol importante pa loke ta trata e fortificacion di bon gobernacion y confiansa di pueblo den
gobierno.
Historia di Ombudsman na Aruba
Na 1997 a institui un comision cu lo ta encarga cu preparacion di e ley pa institui
Ombudsman na Aruba. Añanan a pasa, gobierno y parlamentonan a bay y bin y Ombudsman
a keda semper un topico y nunca a concretisa. Na 2017 cu entrada di Gabinete Evelyn
Wever-croes un di e speerpuntenan tabata institui e instituto Ombudsman. Parlamento di
Aruba a tuma e iniciativa y na 2020 a pasa e ley di Ombudsman pero a opta pa sigui den e
comision di cambionan di constitucion pa ancra e Ombudsman como un Hoog College van
Staat y unda eyden lo ancra e nombramento y kitamento di un Ombudsman. Alabes ta e
intencion cu hunto cu esaki lo crea e cambionan constitucional pa independisacion di
Parlamento di Aruba.
Na momento cu e comision a keda cla, a presenta e ley y esaki a ser trata unda e mesun
iniciadornan di e ley durante e tratamento di ley a entrega un cantidad grandi di amienda cu
ta cambia e ley completamente. Lastimamanete e reunion a keda para y te na 2022 a sigui cu
esaki cu e pensamento cu sanger nobo y mentalidad diferente lo por logra. Lastimamenteatro
atrobe na final di dia no a logra haya 2/3 parti di e cantidad di hendenan presente pa e ley por
a pasa. Esaki a haci cu e Ley di Ombudsman un bes mas a keda para. Mirando esaki mi a
dicidi di tuma e iniciativa y a haci e cambionan corespondiente na e ley y a pidi sra Shailiny
Tromp -Lee y sra Raymond pa ta co-iniciadornan di e cambio di ley aki. Asina na 2023 a
pasa e ley y por a cumindsa e proceso di biaha pa cuminsa e escogencia pa e prome
Ombudsman di Aruba. Ningun proceso a bay sin resistencia di oposicion! Ta bisto cu nan no
tin bienestar di pueblo na pecho, paso pakico bo lo no kier un defensor di pueblo? Danki Dios
despues di tur turbulencia, husticia y bon boluntad pa e pueblo di Aruba a prevalece y dia 1 di
october 2024 despues di 27 aña oficialmente Aruba lo tin su prome Ombudsman.
Funcion di Ombudsman
E funcion di Ombudsman ta uno hopi importante y a proba su mes caba den Reino Hulandes.
E ta un posicion independiente cu no ta cay bao di ningun instancia gubernamental. E tin e
autoridad pa investiga kehonan publico tocante maltrato, tardansa y mal maneho di cualke
gobierno. Despues di e investigacion e Ombudsman ta duna su recomendacionnan pa remedia
e situacion y ta promove den esaki bon gobenracion y transparencia. Den esaki e ombudsman
ta yuda pa fortifica e sistema di gobernacion pa garantisa cu gobierno ta traha na manera
husto y efectivo y e ta exigi pa pone mas enfasis riba responsabilidad y bon gobernacion. Y ta
pa e mes motibo aki pueblo tin di yuda pa engrandece e instituto aki .
Beneficionan di un Ombudsman pa e homber chikito
E Ombudsman ta accesibel y gratis pa pueblo y lo por ta un alternativa mas facil cu bay corte.
E Ombudsman por resolve cualkier keho mas liher y mas eficiente cu un proceso legal. E
Ombudsman lo bin cu sugerencianan na gobierno pa mehora funcionamento di e aparato
publico pa impedi erornan den futuro cu ta afecta e ciudadano di Aruba. Por ultimo e
Ombudsman lo mester protega nos ciudadanonan contra accion inhusto of negligencia di
gobierno of cualkier otro instancia publico.
Pa finalisa, mi por bisa cu mi ta orguyoso di por a logra cu hopi esfuerso y dedicacion pa
fortifica nos democracia y percura pa e instancia di Ombudsman bira un realidad. Ademas e
ta un honor di por aporta na e proteccion di e ciudadano contra mal uso di poder door di
cualkier gobierno of instancia publico. Aruba su bienestar ta mi compas, p’esey mi persona
semper a percura pa construi y no destrui.
