Nn dia di gran importancia pa nos democracia y derecho di estado: e
huramentacion di e prome Ombudsman di Aruba. E Ombudsman tin un rol esencial den nos
esfuerso pa sigura cu gobiernonan y tur instancianan publico mantene nan compromiso cu
transparencia, responsabilidad, y integridad.
Nos mester recorda c’un democracia fuerte ta basa riba respet pa derecho di estado. E
institucion di Ombudsman t’un refuerso directo pa esaki, pa vigila cu e gobiernonan y
instancianan público ta sigui actua na manera husto y transparente. E Ombudsman lo ta un
pilar crucial den e lucha pa combati corupcion y pa defende nos institucionnan y gobierno
contra influencianan dañino.
Aruba tambe a sa di tuma pasonan crucial pa reenforsa e sistema di control. Nos por pensa
riba por ehempel Algemene Rekenkamer Aruba, cual su tareanan ta pa supervisa e cifranan di
pais Aruba y asina nos por mantene un wowo critico riba con fondo público ta wordo usa.
Tambe riba Raad van Advies cu ta un instituto independiente cu ta brinda su conseho
obhetivo y asina percura pa gobiernonan traha abase di integridad y bon gobernacion. Mi no
por keda sin menciona e introduccion di leynan pa combati corupcion structural y pa percura
pa e integridad di nos gobernantenan. Un area clave den e lucha aki pa integridad ta e ley di
financiamiento di partidonan politico. Sin claridad y transparencia den e aspectonan aki, un
democracia no por florece. Ademas. nos no por lubida e ley di screening di ministernan, un
proceso cu mester asegura cu e personanan cu tin e responsabilidadnan mas halto den
gobierno ta wordo evalua den manera estricto pa nan integridad y compromiso pa cu nos
pueblo. E introduccion di Ombudsman ta un instrumento mas pa reenforsa e sistema di
control. E rol di ombudsman ta uno di liderasgo y imparcialidad, unda elo ta e defensor di nos
pueblo, e bos pa esnan cu ta busca husticia, y un protector di integridad di gobierno.
Na prome lugar mi kier extende mi gradicimento profundo na Sra. Shahaira Kelly, pa su
esfuerso incansabel como kwartiermaker cu a haci cu awe nos por a culmina den e bunita
ceremonia di awe. Aunke e caminda tabata uno demotivante y na algun momento tawata
mustra hopi scur, nos a logra! Sra. Kelly awe bo persona ta parti di e logro historico aki pa
Aruba. Sin bo persona, esaki hamas lo por tabata posibel.
Tambe mi kier duna mi agradecimiento na mi coleganan di fraccion di MEP pa nan sosten
continuo, y sigur na mi famia, cu semper a dunami e espacio pa dedica mi tempo y energia na
e proyecto aki. Ademas, un danki na e comision cu a traha riba e werving di nos promer
Ombudsman cu ta sr. Maurits de Kort, sr. David Kock y sra. Xiomara Croes- Williams. Boso
tabata encarga cu un tarea cu no tabata facil y nos cu a traha hunto sa esey. Finalmente y
sigur no menos importante, mi ta gradici nos Griffier di Parlamento sr. Herman Hek. Sin sr.
Hek su esfuerso nada di esaki tabata posibel y no obstante tur obstaculo cu a ser poni bo
dilanti, Dios semper ta husto y hunto cu hopi dedicacion nos a logra cu awe Ombudsman ta
un realidad.
Pabien di curason na Sra. Jurima Bryson, cu awe a huramenta como e prome Ombudsman di
Aruba. Cu Dios iluminabo y yuda bo den e tarea desafiante cu bo tin bo dilanti, pa bo por
trece husticia y ta e bos pa esunnan cu mester di dje. Sra. Bryson, manera tur reto den bida,
den esaki tambe bo lo haya obstaculonan den bo caminda, pero mi ta sigur cu perseverancia y
bon boluntad, bo lo logra supera tur reto cu lo bin den bo caminda. Mi kier felicita tambe
famianan, cu sin duda lo ta un pilar di sosten pa bo den e trabou importante aki. Ta un
momentu di orguyo no solamente pa bo, pero pa tur bo sernan keri y pa Aruba como un pais.
Mi ta termina bisando cu democracia di Aruba awe ta di fiesta y sigur awe historia a ser
skirbi cu despues di 27 aña Aruba tin su prome Ombudsman den man di un yiu di tera
profesional cu ta goza di mi confiansa total.
Pabien Aruba y biba nos democracia!
