Awe, dialuna 26 di september 2022 tin un reunion tripartiet na Hulanda. Un reunion entre Aruba, Curacao y Sint Maarten den preparacion di reunionnan di IPKO. IPKO ta Interparlementair Koninkrijksoverleg cual ta un reunion cu ta tuma lugar dos bes pa aña entre e parlamentonan di Aruba, Curacao, Sint Maarten y Hulanda.
Puntonan di agenda
E dia ta habri caminda representantenan den Raad van State di Aruba, Curaçao en Sint Maarten lo duna un presentacion encuanto e siguiente puntonan: Raad van State di Reino, reglamento encuanto e proceso supervision financiero y Reino Hulandes, tratadonan y Unierecht. Prome cu lunch nos lo trata e punto di relacion den Reino awe y den futuro. Mas tanto lo kier para keto na na con nos por fiha un bista pa futuro descartando e relacionnan actual. Mas cu claro e intencion ta tambe pa trata e aspecto di mehoracion den nos relacion den Reino caminda lo uza como punto di salida e mocion presenta pa Van Raak y de Graaf.
Despues di lunch nos lo duna atencion special na enseñansa. Pa ta mas specifico e situacion y retonan di nos studiantenan na Hulanda, cual ta un punto cu mi persona a pone riba agenda. Special pa e topico aki a invita Nationale Ombudsman di Hulanda Reinier van Zutphen cu a haci un investigacion encuanto nos studiantenan. Resultado di dicho investigacion nos por lesa den “Kopzorgen van Caribische Studenten”. Mi ta di opinion cu nos mester por uza e plataforma di IPKO pa yega na solucionnan concreto pa problemanan di nos ciudadanonan. Den e caso aki nos studiantenan. Otro aspectonan cu nos lo atende ta supervision financiero, Geschillenregeling y reunion di IPKO. Ultimo tempo esakinan ta forma parti structural di nos reunionnan tripartiet. Ta puntonan cu ta concerni nos tur 3 of cu nos tur 3 ta desea.
Pues, nos ta habri siman cu un dia largo pero mi ta convenci cu e lo ta uno fructifero. Mi kier invita bo pa keda pendiente mirando cu mi lo sigui informa e dianan nos dilanti con e reunionnan ta bayendo.
