Un cos cu a resalta den e pandemia aki ta con lihe hopi di nos maestronan por a adapta na e situacion y con nan a haci tur cos cu ta na nan alcanse pa keda brinda enseñansa. Alabes mayoría di scol por a atende cu e exigencia cu a bin riba nan inesperadamente.
Na mes momento hopi aspecto a keda accentua caminda nos mester realisa cu nos maestronan mester ayudo y sosten pa por cumpli cu cierto di e retonan cu nan ta encontra diariamente. Banda di cierto limitación cu infrastructura y material, tin un necesidad grandi pa formación riba cierto tereno y tambe di herment pa atende cu cierto situacionnan.
Pa es motibonan aki mes a pone central den MEP su Programa di Enseñansa 2021-2025 ‘Siña bon awe pa cosecha mañan’ cu lo duna ayuda y sosten na nos maestronan. Diferente punto lo haya nan atencion specifico, esta:
- Recapacitacion y guia continuo y practico di Cabesante-/ Director- y maestronan segun nan necesidad y tambe desaroyo den enseñansa. Esaki sigur ta un di e puntonan cu hopi biaha a keda presenta durante diferente reunion cu e veld di enseñansa.
- Crea un plataforma caminda por comparti y siña di otro. Duna reconocemento pa esfuersonan haci den enseñansa y comparti esakinan cu otro scol como ‘best practices’. E punto aki ta crucial y necesario. Por ehempel door di e pandemia a keda demostra cu cierto scol por a haci e transicion pa duna les online relativamente lihe y na un bon manera, otronan te ainda ta struggle cu esaki. Door di comparti conocemento y of crea plataformanan caminda colectivamente scolnan por a atende cu enseñansa dirigi riba nos muchanan sigur lo a yuda. Lastimamente e manera di traha aki no ta usual y mester keda fomenta. P’esey e meta aki ta asina importante;
- Sigui stimula inversion responsabel den innovacion cu enfoke riba formacion y uzo di esaki den enseñansa. Mester pone como prioridad pa sigui amplia conocemento y capacidad riba tereno di innovacion y digitalisacion di nos maestronan. Aki por pensa no solamente riba e Proyecto Digiboards cu ya ta tumando luga, pero tambe tur material digital manera programanan y metodonan cu ta bay cu esaki. E base di nos maestronan constantemente mester keda fortifica pa nan por desaroya segun innovacion ta tuma luga;
- Percura pa suficiente personal: un ‘zorgteam’ (posiblemente cu trahado social) cu por asisti e maestro debidamente. Esaki ta un proceso cu ya a keda entama bou di Social Crisisplan pero na mi opinion mester ta algo structural y duradero y no temporal;
- Bin cu structura di duna conseho explicitamente pa maestronan: lo brinda guia, coaching, asistencia tecnico, emocional y riba nivel psicologico. Loke un maestro mester deal cu ne awendia ta mucho mas cu solamente duna les, banda cu nan tin nan mesun famia y necesidadnan. E pandemia sigur a haci e situacion aki mas pisa y complica cual sigur ta haci cu e punto aki ta uno di gran necesidad pa por garantisa cu nos maetronan por sigui haci nan trabou debidamente;
- Amplia seccion di guia di Departamento di Enseñansa, unda ta brinda mas oportunidad pa guia riba formacion didactico y pedagogico nobo y unda lo haci uzo di seminario, workshops y dianan di estudio;
- Lo bini cu un sistema efectivo caminda kehonan di mayornan, docente/cabesante ta wordo atendi a corto plaso;
A keda enfatisa e necesidad riba e terenonan aki riba menciona. E procesonan aki lo bay den consulta cu tur stakeholders, den un proceso transparente y consultativo.
Sigur e aspecto innovacion ta un tema cu desde inicio di Gabinete Wever-Croes a keda poni central den e maneho di gobernacion. E compromiso pa hancra innovacion den enseñansa ta evidente den e maneho di Minister President Evelyn Wever-Croes. Meta semper ta pa percura pa un Aruba resiliente unda cu e ciudadano y nos muchanan tin tur locual nan mester na recursonan y habilidadnan pa por ta exitoso den siglo 21. Pa logra esaki sigur mester inverti den formacion continuo di nos maestronan.
Hunto nos ta avansa y mi ta convenci cu trahando hunto nos ta logra mas. P’esey 25 di juni venidero pueblo mester vota consciente. MEP a demostra cu nos a bin ta haci un tremendo trabou den Gobierno y den Parlamento. Si bo kier haya sa mas di mi persona y kico mi ta para pe, por sigui mi via mi Facebook Shailiny ‘Shai’ Tromp-Lee of via Instagram. E biaha aki mi ta number 11 riba e lista victorioso di MEP”.