Presidente di Parlamento ta bolbe comete un eror ora cu el a bin dilanti y informa prensa cu e ta hala aden e mocion di desconfiansa contra di ex-Minister Marisol Lopez Tromp y hasta a declara e mocionnan aproba, totalmente nulo.
Miembro di fraccion di AVP, drs Mervin Wyatt Ras, a mustra cu un biaha mas Presidente di Parlamento ta sigui comete eror tras di eror y por lo general Presidente Thijsen tin cu regla su foutnan den e forma corecto y segun leynan existente y si e Presidente ta sincero cu su mes, e lo tene e honor na su mes y entrega su retiro.
Presidente di Parlamento Adi Thijsen a declara diaranson mainta cu su persona lo trek in e 3 mocionnan cu a wordo aproba den Parlamento dia 15 di oktobe na un forma ilegal, un forma caminda no tabatin quorum na momento di votacion.
E presidente a indica cu e ta para pa interes general y cu su persona ta interpreta e situacion aki na un otro forma pero ningun momento a acepta cu el a haci algo robes den e reunion menciona.
Wyatt-Ras ta lamenta esaki masha hopi mes pasobra e Presidente no a actua na un manera corecto, ya cu tur hende cu a mira e reunion di dia 15 di oktober, por a constata cu na momento di votacion pa e tres mocionnan, no tabatin suficiente miembro di Parlamento den sala pa asina duna e sosten cu ta rekeri segun nos constitucion, articulo III .16.
Tambe e no a actua segun reglement van orde, articulo 27, den cual ta stipula cu na momento cu un miembro di parlamento of e Presidente constata cu no tin quorum, mester trece esaki dilanti y actua segun reglanan existente, principalmente na momento di un votacion.
Wyatt-Ras ta trece padilanti cu durante di votacion cada miembro di Parlamento ta haya e oportunidad di expresa su opinion encuanto un asunto, topico of ley cu ta wordo trata den Parlamento. Esaki e ta haci na defensa di interes di nos pueblo. Ta pesey votacion ta di importancia y ta necesario netamente pa esnan cu ta forma quorum mester tey den sala di Parlamento pa e reunion por continua. Na momento cu no tin quorum Presidente mester lesa tur nomber y chek ken tey y si e tin 2 tercera parti di e total di miembronan. Si e no tin e cantidad necesario di Parlmentarionan e mester verdaag e reunion pa un otro ocasion.
Presidente di Parlamento no a cumpli cu esaki caminda hasta por a mira riba grabacion di e website di parlamento, cu na momento di votacion, e Griffier mes a mira cu cierto persona no ta presente den sala pero e reaccion di Presidente tabata un si, si , si.
Eynan por a ripara cu e Presidente a comete un eror a sabiendas cu e cantidad necesario di Parlamentario no tabata presente y esaki no ta cuadra cu e integridad cu mester tin den Parlamento y tampoco ta cuadra cu e integridad cu Presidente di Parlamento mester carga pa Parlamento.
Ta bin acerca cu despues di e votacion den un forma ilegal, Presidente ta bira tuma contacto of manda carta pa Minister Presidente, caminda esaki tampoco por ya cu tur decision cu wordo tuma den Parlamento, tur locual ta trata parlamento, e Presidente ta esun cu mester trece esaki dilanti pero e di su mes, no por tuma e decision di tuma contacto cu kende e ta haya ta bon y e mester sali for di Parlamento.
Esaki a base articulo 6 di reglement van orde cu ta bisa lo siguiente: “de taak van de voorzitter bestaat voornamelijk in het leiden van de werkzaamheden van de Staten, het nauwgezet in achtneming en doen naleven van reglement van orde, het handhaven van de orde bij de beraadslaging, het schorsen van de beraadslaging, het verlenen van het woord, het formuleren van de punten omtrent de Staten een beslissing moeten nemen, het aankondigen van de uitkomst van de stemmingen, het uitvoeren van de besluiten door den Staten genomen.
De Voorzitter vertegenwoordigt de Staten naar buiten.”
Pues aki por mira cu tareanan di Presidente di Parlamento ta hopi bon defini y den e caso aki presidente a bay ‘buiten het boekje om’ y si e kier “readreseer” loke a tuma lugar na un forma corecto, sr Thijssen tin cu bin bek Parlamento. Parlamento lo dicidi.
E tin cu bin bek den un reunion publico si e kier trek nan in. E tin cu trata e mocionnan aki pa motibo cu e mocionan aki e presidente no a presenta nan, pero ta miembronan di Parlamento cu ta representa un cierto grupo, toevallig nan ta di su propio partido. Kisas e ta previlegia nan, pero e mocionnan a wordo presenta pa miembronan di Parlamento y ta nan por trek in nan mocion.
Pues Presidente tin cu bay bek den un reunion publico. Como ex-Presidente di Parlamento, Wyatt-Ras a haya su mes den situacionnan dificil y na e momentonan ey a laga Griffier di Parlamento traha un “proces verbaal”. Den e verbaal aki ta describi na un forma obhetivo kico a pasa precisamente, pa asina por tuma un decision tocante di esaki na un manera obhetivo.
Na e momentonan aki nos Parlamento ya na tur parti di mundo hendenan ta bisa cu Aruba ta un bananenrepubliek, c’un bananenregering y awor un parlamento di banana.
Fraccion di AVP no por acepta esaki y como parlamentarionan mester para pa esaki caminda Presidente di Parlamento a comete un eror, a bisA prensa cu el a comete un eror y e ora e tin cu bin bek parlamento pa drecha e eror aki.
Esey Wyatt-Ras y su fraccion ta exigi mescos cu pueblo tambe ta exigi di un Presidente di Parlamento pa bin coregi e eror aki publicamente den un reunion sigur ora cu fraccion di AVP a mustra bon cla cu a usa un reunion riba tiramento di pisca pa bira core cu un minister. Esaki no ta e prome biaha cu sra. Lopez Tromp ta wordo saca for di seno di partido ni Staten dor di mesun partido, awor den combinacion cu otro fraccion. Na anja 2010 hunto cu Wyatt-Ras Mep a sak’e for di partido y awor dies anja despues ta bolbe sak’e.
“Presidente di Palamento mester bin bek parlamento, duna cuenta na Parlamento riba loke a sosode y si sr. Thijsen no haci esaki, anto e ora e tin cu refleha y despues tene e honor na su mes y entrega su retiro como Presidente di Parlamento,” Parlamentario Mervin Wyatt Ras a declara.