ORANJESTAD,Aruba
Durante di un entrevista, miembro di fraccion di AVP, drs. Mervin Wyatt Ras, a trece su preocupacion padilanti pa loke ta trata Aseguro General Medico of Algemene Ziektekostenverzekering (AZV). Gobierno di AVP a lanta AZV na 2001 y na 2014-2016 a drecha e situacion financiero di AZV di un deficit di 180 miyon pa entre 20-30 miyon florin y gradualente a haci e landsbijdrage den AZV menos.
Wyatt-Ras a mustra cu dor di casonan di COVID 19 na nos pais desde 13 di maart di e aña aki, e pais ta enfrentando diferente reto financiero, di salud, laboral y social.
“Pa cuminsa ora buelonan a ser cancela, nos turismo a ricibi un sla duro. Hotelnan a cera y industrianan relata na hotelnan, manera entre otro restaurantnan, taxinan, carrentals, cierto tiendanan y contratistanan, a sufri daño.
Scolnan, crechenan, Trai Merdia a cera temporalmente. Sector social ta enfrentando mas caso cu problema, e sector di husticia y cuerpo policial ta ‘on the go’ y e sector di salubridad ta mas activo cu nunca.
Mas o menos 37.000 persona a perde trabou y no por pone pan riba mesa di nan famia. Un parti chikito esta 3000 persona a haya tiki yudansa di gobierno (950,- florin) pero esaki no ta suficiente.
Dor di falta di actividad comercial y economico e entrada di caha di gobierno a baha drastico. Si no tin benta, no tin entrada di BAZV y si no tin trabou, primanan di seguro no ta ser paga. Entradanan pa entidadnan manera SVB y AZV, consecuentemente a baha drasticamente.
Mientras tanto e zorgkosten of gastonan di cuido di AZV si a keda casi igual, apesar cu dokternan ta atende pashentnan telefonicamente, no ta mandando pashentnan den exterior, specialistanan ni terapistanan no ta atendiendo casonan, no ta mandando pashentnan den exterior pa tratamento ni ta haci uso di Air Ambulance.
Segun Wyatt-Ras ta parse cu gobierno no ta mira e embergadura di e situacion ocasiona dor di COVID 19. A lanta comisionnan, tin ta consisti di nan friends and family y hasta di nan amigonan cu ta cobra diferente pensioen. Sinembargo no tin un “brede draagvlak”.
E minister presidente ta tur anochi y awor cada pasa dia na television anunciando cuanto caso tin, cuanto ta positivo, cuanto a recupera y ta manda tur hende keda paden y e minister di salud ta bin papia solamente ora cos ta bon, ta menciona cantidad di casonan cu a baha y ayudo ricibi di ICU for di Hulanda.
E minister di enseñansa ta probecha y ta haci tur scol na Aruba bay den un fundacion sin consulta cu e veld. Cada un ta riba nan mes. Gobierno ta falta vision y liderazgo pa atende cu e problematica grandisimo aki.
Hulanda no tin confiansa den Gobierno di Aruba. Gobierno a pasa Parlamento un “fastball” ora a entrega un presupuesto di 1.3 biyon deficit. Esaki basa ariba 9 luna sin actividad economico. Ta pesey te awor a haya solamente 90 miyon via di Hulanda, mientras cu Corsou y St. Maarten si a ricibi mas cu Aruba. Hasta por a tuma nota cu Hulanda kier pa gobierno di Aruba cambia e presupuesto 2020 ya caba aproba den Parlamento.
Contrario na Parlamentarionan cu lo duna 25% di salario pa yuda nos pais e ministernan no a mustra disponibilidad pa baha nan salario igual cu Parlamento of hasta mas, p.e. 30 %. Tampoco tin disponibilidad di gobierno pa corta den nan gastonan di operacion. Esaki no ta corecto ni acceptable y ta pesey tambe Hulanda no tin confiansa den gobierno.
Pa loke ta trata e fondo di AZV Wyatt-Ras ta spera cu gobierno por asumi su responsabilidad y consulta cu gremionan y crea un base amplio di dialogo pa logra evita cu mayan pueblo ta haya e cuenta presenta pa paga.
Ta keda inportante pa cada ciudadano por ta trankil cu ora e bira malo e por haya cuido medico di calidad. Si no haci nada awe mayan lo no tin AZV mas,” Parlamentario Mervin Wyatt Ras a declara.
![Parlamentario Drs. Mervin Wyatt-Ras: Mientras Azv Su Entradanan Ta Reduci No Tin Claridad Riba Kico Gobierno Kier Haci 155 Image 2](https://www.earubianonews.com/wp-content/uploads/2020/05/image-2.jpg)