Durante reunion publico di Parlamento pa trata e fondonan cu Hulanda a pone disponibel pa atende e problematica di migrantenan, Lider di fraccion di POR, Dellanire Maduro a indica cu e ley aki ta hopi importante teniendo na cuenta e derechonan humano.
Fuera di e situacion economico-social y inestabilidad politico cu ciudadanonan di Venezuela ta bibando, e crisis di COVID-19 ta empeora esaki mas ainda. “Tur esaki no ta duna mucho opcion y ta trece angustia y desesperacion cu ta haci cu e ciudadonan di e pais aki ta busca un miho futuro pa nan mes”.
Banda di tur esaki segun un encuesta realisa, diadomingo awo lo tuma luga eleccion parlamentario na Venezuela, unda cu 8 di 10 persona no lo participa na e eleccion aki. Tur esaki ta hiba cu e situacion critico di Venezuela no lo wordo soluciona di un dia pa otro y lo keda ta uno preocupante pa cu su efectonan pa nos isla.
Tambe por a tuma nota algun dia despues di Dia Internacional di Derecho di Mucha, a ser informa cu un boto cu 16 mucha incluyendo un baby di 4 luna a wordo deporta, no tabata sa e paradero di esaki. Bisando esaki, ta mira cu ta hopi importante pa nos pais tin e recursonan necesario pa atende cu migrantenan di forma humano, cumpliendo cu tratadonan internacional.
Continuando, Maduro a expresa cu e fondonan y ley aki Aruba por percura pa maneha e migracion di persona di forma responsabel respetando drechonan humano. E punto aki ta hopi importante y ta algo pa aplaudi. Den cuadro di esaki el a pidi Prome Minister pa elebora un poco mas riba e bishita di Minister di Asuntonan Exterior Stef Blok, unda e tema di migracion, posibilidad di visa y situacion di Venezuela a wordo atendi.
Igualmente Dellanire Maduro a puntra Minister di Husticia cuanto persona a repatria te cu awo? Cuanto vuelo esaki ta representa? Si por splica riba e tereno di cuido medico con ta percura cu e personan aki ta haya atencion medico?
Den e ley ta menciona e fondo pa cumpra “koelkast” pa warda vacuna na DVG, si e “koelkast” special aki a yega Aruba caba?
Finalisando, e parlamentario a puntra si e migrantenan lo haya e vacuna contra COVID-19 y tambe si personal di Warda Nos Costa entre otro lo haya e vacuna contra COVID-19 asina esaki ta disponibel na Aruba mirando cu nan tambe ta forma parti di e frontliners/first-responders.
