ORANJESTAD,Aruba
No ta nada facil pa ningun gobierno rond mundo, atende cu e impacto economico y financiero cu e pandemia di corona virus a ocasiona, sinembargo aki na Aruba tin un gobierno cu a dicidi di tuma decisionnan contra di Parlamento, contra di su trahadonan, contra interes di pais Aruba.
Miembro di fraccion di AVP, Benny Sevinger a mustra cu apesar di e pandemia aki cu tambe Aruba ta sinti su efecto grandi, gabinete Wever Croes prome cu e pandemia aki a bati na porta, ya caba gobierno tabatin un set di medida na caminda pa tuma.
“Esaki ta berdad ya cu prome cu e pandemia a yega den nos pais, gabinete Wever Croes tabatin un set di medida cu nan a sigura Hulanda cu nan lo bay tuma, caminda principalmente a bisa cu lo bay na reduci gastonan di personal den forma structural.
Aworaki gobierno ta usando e pandemia como excusa bisando entre otro cu Hulanda ta esun cu ta poniendo presion pa corta den salario di ambtenaarnan pero esaki tabata algo cu mester a sosode caba sin e pandemia mes.
No ta por nada gobierno a informa e sindicatonan cu nan por wel lubida indexering ya cu ta 75 cen nan por haya ya cu a palabra cu Hulanda caba cu nan ta bay corta den gasto en bes di aumenta gastonan.
Na momento cu pandemia a bati na porta, gobierno a bin Parlamento caminda fraccion di AVP a duna cooperacion pa un reunion publico pa pasa un presupuesto caminda Aruba lo mester bay fia placa, pa di e forma aki por bay fia placa pa di e forma ey por garantisa entrada di pais Aruba.
Gabinete Wever Croes a bin parlamento y a trece un presupuesto di mas cu 1.3 biyon florin di deficit.
Esaki ta nifica cu gobierno a bin pidi parlamento pa duna nan autorisacion pa fia 1.3 biyon florin sin cu nan a corta den e presupuesto, sin cu nan a tene cuenta cu entradanan cu por ehempel cu Aruba lo haya den e pandemia aki mes, ya cu por bisa cu economia lo cay c;un porcentahe hopi grandi pero tog lo tin placa cu lo drenta den caha di gobierno y no a tene cuenta cu esaki.
Gabinete Wever Croes simplemente a dicidi di bay fiha full e presupuesto y esey a dicidi di manda Hulanda y ta mas cu claro cu Hulanda ta punta cual ta e tarea cu gobierno di Aruba lo bay haci manera priminti, di baha gasto di personal.
Esey ta e prome pregunta cu Hulanda a haci na gabinete Wever Croes y si dado caso gobierno tabata di acuerdo caba pa baha salario di ambtenaarnan, caminda ya caba nan a bisa Hulanda cu nan ta bay reduci gasto di personal cu 90 miyon florin.
Ningun momento Hulanda a exigi pa corta salario di ningun trahado publico pero Hulanda a bisa pa baha gasto di personal y pa esaki gabinete Wever Croes tabatin dos escogencia, caminda por baha gasto di coordinadonan y tur hende cu gobierno a nombra.
E otro ta di e ministernan cu ta los for di e ministernan cu tey aworaki manera Nel Oduber, Eddie Briesen, Nilo Swaen, Rudy Croes y awor Otmar Oduber cu tambe ta den e lista aki, kendenan ta cobrando nan pensioen pero ta cobrando un salario tambe.
Tambe tur e rumannan di e ministernan, caminda Minister Glenbert Croes tin tres ruman trahando p’e, tur e primo- primanan di Prome Minister Wever Croes, ta eynan mester a cuminsa corta pa mustra Hulanda cu en berdad ta cortando gsto di personal.
Pero no kico gabinete Wever Croes a dicidi pa haci, ta di laga tur e hendenan eynan na trabou y ta dicidi di bay corta completo den e aparato di ambtenaar y usando e excusa cu ta Hulanda kier impone e cos aki riba gobierno.
Esaki ta inaceptabel, tur hende ta dispuesto pa entrega pero den e forma aki caminda tin cu duna gobierno espacio pa keda duna friends and family, oficina di abogado cu ta di papa cu ta bay cu miyones, pa sigui cumpli cu esaki, tur ambtenaar tin cu wordo sacrifica.
Hulanda a bira bisa cu e kier un maneho structural den e proceso di reduccion di gasto di personal y nada di te cu december pero te cu “nadere orde,” loke por bira “tot semper.”
Esaki ta un decision cu gabinete Wever Croes a tuma sin bin Parlamento, sin drenta den dialogo cu e sindicatonan y awor kier laga pasa cu ta Hulanda ta poniendo presion mientras cu tur documento di acuerdo riba plan di reduccion di gasto di persona, a wordo firma pa Prome Minister y Minister di Finansa for di varios luna pasa prome cu e pandemia a bati na porta,” Parlamentario Benny Sevinger a declara.
