“For di añanan 1985 ora e pais tabata den multiple crisis severo y cu tabata exigi cambionan structural, pueblo no a conoce un gobierno cu asina un falta di urgencia, falta di creatividad, falta di iniciativa, falta di forsa moral y falta di credibilidad, manera cu tin awor aki aña 2022!
Ta tristo, cruel pero berdad! Ta henter PUEBLO ta sufri pa e motibonan aki!
E solo hecho cu mientras cu e pais ta den e pandemia ainda, bibando di placa fi’a di Hulanda y den pleito constante cu Hulanda, e Minister encarga entre otro cu financia publico, ta organisa un mini-carnaval y e mes ta “jump-up”como si fuera cu ta coy fiesta tin, mientras cu e pais ta den un pandemia caminda mas cu 200 hende a muri y hopi otro a perde trabou, entrada y salud.
Si e mandatario a scoge pa “jump up” mes, e dia despues su persona lo mester tabatin proyectonan y iniciativanan economico, financiero y social cla pa ehecuta. Pero nada! Comosifuera nada no a pasa e dos añanan cu a pasa, caminda gabinete Wever Croes a sigui su paso di cangreu lagando comercio y pueblo pa su cuenta, mientras nan a ranca mas placa di Pueblo pa gasta na cosnan cu realmente no ta sirbi Pueblo.
Turismo ta casi bek caminda e mester ta y danki Dios! pero e no ta pasobra gobierno actual a tuma cualkier iniciativa pa acelera e recuperacion pero ta danki na doñonan di hotel, companianan di aviacion, restaurant y otro empresanan priva den turismo y ATA, cu turismo a crece asina bon.
Pero resto di nos economia? Siman pasa numa e minister encarga cu economia e tene su prome reunion di un comision pa inventarisa posibel iniciativanan pa stimula economia! Siman pasa….numa!
Ta kico gabinete Wever Croes a pensa? Cu Aruba su economia lo a recupera di su mes? Nan por a djis wak rond den mundo pa wak cuanto otro pais a y ta haci pa logra un tiki recuperacion y cuanto ta wordo haci pa renoba y diversifica nan economia. Pero gobierno di Aruba apenas a cuminsa reuni siman pasa? Unda e sentido di urgencia a keda cerca nan?
E urgencia cu Pueblo, empresanan mediano y chikito, scolnan y organisacionnan social ta sinti, pa bolbe hala rosea un tiki normal?
Ta comosifuera tur cos ta OK, mientras cu nos gobierno tambe sa cu pa un gran parti di Pueblo, bida a bira mas dificil y entrada cu a cay no a drecha. Al contrario,! anto esey ta sin conta tur e medidanan cu gabinete Wever Croes mes a tuma den e ultimo cinco aña y caminda tur hende, incluso comercio y turismo, ta teme pa e medidanan cu ainda ta bay bin!
E maneho di financia di gobierno ta simplemente increibel ya cu nan a tuma medida tras di medida pa cinco aña caba y parce cu nan no ta realisa ki efecto e medidanan aki tabata y tin riba cada famia y cada empresa.
E mesun gobierno aki a presenta presupuesto tras di presupuesto cu deficitnan grandi y a pone sumanan grandi den presupuesto pa gasta na cosnan cu sigur no ta urgente.
E autonan di 150 y 160 mil florin den un crisis ta djis un di e ehempel nan tristo! y danki na oposicion y Raad van Advies, pueblo a bin haya sa cu gobierno e aña aki so, sin conta e otro añanan, ta bay gasta casi 39 MIYON florin mas cu 2017, na huur edificio, nombra mas hende pa funcionnan cu no tin mester, na paga abogadonan pa trabou cu e huristanan di gobierno mes mester haci y mas cos cu no ta necesario! Unda e sentido di prioridad corecto y urgencia a keda pa uza e placa cu tin, na cosnan cu ta necesario pa crea trabou, kita medida, alivia e peso riba Pueblo, evita mas medida y inverti den cosnan cu Pueblo tin mester!
Si scucha y analisa discursonan y forma di trata temanan importante den Parlamento di Aruba, no por sinti cerca e fraccionnan cu ta sostene e actual gobierno, e urgencia cu tin den Pueblo pa haya sikiera un alivio den nan bida diario. Al contrario: e defensa barata di e fraccionnan di gobierno di cosnan cu ta totalmente inaceptabel y bou niun circunstancia, tin hende babuca.
Pa no papia mes di e gastamento di placa: 40 MIYON na “Social Crisis Plan” y e problemanan social a bira mas grandi; 1.6 BIYON na un contract di LNGcu te awe ta scondi!
38 MIYON di mas den gastonan di abogado, edificio, personal innecesario. 60 MIYON na FASE cu segun rapportnan di CAD y ARA ta mustra cu hopi cos a bay robes.
Ta unda ta sali cu gastamento di tanto placa, mientras na mesun momento ta corta den cuido medico, hisa placa pa scol di muchanan, hisa prijs di awa y coriente y ainda falta e belasting nobo di BTW di 18%! Ta ki sorto di representantenan di Pueblo tin cu ta trata Pueblo como e enemigo y e gobierno cu ta malgasta pueblo su placa como e “victima inocente” of pio, e “bon samaritano”!
Danki Dios, na aña 1986, nos pais a conoce probablemente un di e gobiernonan cu mas iniciativa, energia y creatividad, cu a introduci cambionan economico, social, educativo y legal, cu a saca nos pais for di e crisis den apenas tres aña. Ban spera Dios y Pueblo bolbe duna e pais pronto un gobierno manera nan a conoce na 1986 y na 2009 cu si tin e forsa moral, e experiencia y e sosten politico, pa bolbe saca nos pais di e crisis (semi-permanente) actual y bolbe rescata e di e gara destructivo y corupto di e gobierno actual di RAIZ/MEP.
Un gobierno cu si ta wak e urgencia pa actua lihe y uza nan experiencia pa trece cambionan drastico, un gobierno cu ta actua cu e sentido di urgencia cu Pueblo tin!”