Hulanda no ta respeta democracia di pais Aruba y esey a keda confirma diamars siman pasa ora cu Parlamento a trata e cambio di ley di LTU, caminda funcionarionan di gobierno Hulandes cu ta bin traha na Aruba como parti di e acuerdo cu gabinete Wever Croes a firma, por trece nan famia sin cu mester cumpli cu nada.
“Durante tratamento di e cambio di ley di LTU, gobierno a entrega un set di documento na parlamento, den cual ta poni cu e cambionan cu nos a trata dia 2 di maart, ya caba a bira oficial dor di Hulanda for di dia prome di februari, ya cu e ta para den documentonan riba e acuerdo cu tin.
Pues e mesun Secretario di Estado cu ta papia cu democriacia mester prevalence na Corsou, ta bira haci net lo contrario akin a Aruba y tur miembro di e tres fraccionnan cu ta sostene gobierno, a hisa man y acepta esaki sin mas.
Loke e cosnan aki ta nifica ta cu Parlamento di Aruba tin net nada di bisa pa loke ta cambionan cu ta bay bin segun e Landspakket y tin cu acepta cu ta Hulanda ta dicidi y parlamento ta gewoon tin cu acepta tur loke ta bin den su direccion.
Tas bon pa pueblo sa kico e cambionan cu a wordo aproba pa e tres fraccionnan di gobierno ta nifica, caminda tur persona cu Hulanda ta manda Aruba como Rijksambtenaar, of cu lo bin traha den cualkier NV di gobierno of institutonan di gobierno, cu por ta Setar, WEB of Elmar, nant a haya un permiso pa ‘rechtswege.”
Semper tabata asina nan ta haya un permiso cu por traha na Aruba sin ningun problema pasobra nan ta traha pa gobierno di Aruba y den e caso aki Hulanda ta manda nan y nan ta haya permiso cu no ta un problema.
Sinembargo e cambio cu a bin ta e funcionarionan aki, por trece su partner, su casa of por djis bisa cu esaki ta mi partner y e persona aki, esta e partner of casa, ta haya ‘van rechtswege’ y e por traha unda cu e kier tambe.
E parti descriminatorio di esaki ta abo como Arubiano, ta casa c’un persona di afo, bo kier bin inscribe bo matrimonio pero bo casa tin cu sinta warda su permiso den exterior, anto lo costa e hende un aña por lo menos, pa e ciudadano por bay DIMAS, pa e bay Censo, pa por bay haci testnan na Censo pa entre otro nan puntrabo cosnan personal di bo casa y otro cosnan, pa por trece bo casa Aruba pa asina e haya un permiso van rechtswege.
Anto un ambtenaar cu ta yega for di Hulanda, ta solamente bisa, ‘tende esaki ta mi partner’ y e no tin nodi di ta casa y tampoco tin cu mustra autoridadnan algo y ta bisa ‘dune su van rechtswege.’
Wel esey Parlamento di Aruba a aproba diamars siman pasa y esey ta nifica cu Hulandesnan cu ta bin cu cualkier parti di Reino cu ta bin traha pa gobierno, nan partner tin libertad pa biba y traha y hasta tuma cualkier trabou cu nan kier akin a Aruba y abo como Rubiano, cu ta casa of bo ta un ambtenaar, bo no tin derecho ni pa bo casa, corda pa bo partner. Bo no por bisa manera e funcionarionan Hulandes, cu esaki ta mi partner y tur cos ta ok, no por.
Nos a para bira ciudadanonan di segunda categoria, den nos propio pais y esey ta loke e ley di LTU cu a pasa diamars siman pasa den Parlamento ta nifica, pues un Hulandes ambtenaar tin mas derecho cu abo como Arubiano.
Anto den e renion aki tabatin 11 cheerleaders cu ta sostene gobierno a zundra si pero despues ta grita “VOOR” y nan tin cu haci esaki ya cu nan Prome Minister Evelyn Wever Croes, a firma dos Rijkswet, a firma protocol y a firma e Landspakketnan den cual ta wordo señala cu e cambio aki ya ta na vigor caba, cu otro palabra Parlamento no tin nada, nada pero nada di bisa riba e asunto aki,” Parlamentario Benny Sevinger a declara.
