Pueblo tin cu realisa nan mes con Evelyn Wever Croes ta tuma pueblo haci, ya cu prensa mes ta haci e pregunta si ta AZV ta tumando e medidanan anuncia dialuna ultimo of ta gobierno ta tumando e medidanan aki.
Miembro di fraccion di AVP, sr Arthur Dowers a mustra durante conferencia di prensa di su fraccion a mustra cu Prome Minister Wever Croes ta forsando AZV den un direccion caminda nan tin cu bay corta y ta laga AZV haci e presentacion di e medidanan y ta bisto cu Evelyn Wever Croes kier sconde tras di lomba di Edwin Jacobs,
“Prome Minister ta haci esaki pa duna pueblo e impresion cu ta AZV ta tumando e medidanan aki pero tur hende por corda durante di campaña electoral nos denuncia esaki caba caminda e lider di MEP a bay Hulanda pa haci dos cos.
El a biaha pa Hulanda y priminti gobierno Hulandes cu e ta bay baha gasto di gobierno y su gobierno no a haci esaki pero aya el inventa e mentira di bisa ambtenaarnan pa duna 12.6% di nan salario pa di e forma ey cumpli cu e promesa cu el a haci ha Hulanda.
Prueba di esaki ta den un sentencia di Corte caminda a wordo conclui cu ta Evelyn Wever Croes a bin cu e medida di 12.6% loke a pone cu Hulanda a pidi tur otro isla haci esaki tambe mescos cu Aruba y na mes momento el a priminti Hulanda cu e ta bay corta 60 miyon florin, 5 miyon tur luna den AZV.
Gobierno Hulandes a gara e vision aki di Prome Minister di Aruba y a informa su persona cu el a bisa cu esaki nan ta bay haci, nan ta bay ehecuta, caminda Hulanda a stempel e proposicionnan aki pa “akoord” y a sinta warda Evelyn Wever Croes pa cumpli cu su propio idea.
Evelyn no a cumpli cu loke e mes a sugeri caminda prome cu eleccion el a dal pueblo cu e lawina di medida den AZV y ora cu pueblo a cuminsa lanta contra di e medidanan aki, el a dicidi di bin cu otro mentira pa calma tur hende.
Evelyn a bisa cu e ta bay traha un rapport pa bay mira con ta bay baha e gastonan sin haci pueblo dolor y hasta a haci un declaracion na prensa, cu e ta bay duna esunnan di menos recurso, un tipo di subsidio pa nan por cumpli cu tur e un of dos florin cu nan tin cu paga pa remedi.
Elecciona pasa y pueblo no a tende nada mas di e plan aki y awor nos ta haya señor Edwin Jacobs bin cu bin dilanti y papia di e medidanan, ya cu Evelyn Wever Croes no tin e curashi mas y tampoco e cara mas, pa bin dilanti y informa pueblo cu el a bolbe gaña henter pueblo.
En realidad henter e asunto aki ta como si fuera Evelyn ta hari pueblo, ta saca lenga pa tur hende pa motibo di a bolbe gaña tur hende y cu loke ta mas tristo, e ta pensa cu tur hende a kere y acepta su mentiranan.
Evelyn Wever Croes, bo persona ta responsabel pa tur e medidanan aki pero keda pendiente ya cu rosea di pueblo ta riba bo y lo keda riba bo y mas rosea bin riba bo ora cu hendenan no tin placa pa cumpra pan, no tin 5 florin pa lechi pa nan yiu, no tin placa pa cumpra pampers, ya cu nan mester tin cinco florin na man pa paga pa atende nan yiunan si nan bira malo.
Loke bo ta haciendo ta na e momentonan aki, ta imponiendo medidanan cruel contra pueblo ya cu bo no tin e curashi di para e fiesta di ‘friends & family’ y bo no por stop cu e malesa cu boso tin di favorece famia y esunnan cerca di boso y tambe indirectamente y directamente pa boso saco y pesey boso tin cu yega cerca hendenan mas vulnerabel den comunidad y saca placa for di nan cartera.
Ora cu punta kico ta e medidanan y kico ta e otro cosnan cu lo por haci, e solucion ta di baha gasto y ta esey boso a priminti pueblo y nunca a haci,” Parlamentario Arthur Dowes a declara,
