No tin duda cu Prome Minister Evelyn Wever Croes, ta determina pa no atende cu tur loke ex Minister Plenipotenciario Guilffred Besaril a haci na Arubahuis caminda un biaha mas el a bin dilanti y den forma energico, a mustra cu no tin investigacion oficial andando.
Parlamentario Arthur Dowers di fraccion di AVP, ta kere cu e impresion cu Prome Minister ta dunando den e caso di Besaril, ta cu e ex Minister Plenipotenciario mester por sa un secreto di e lider di MEP pa motibo cu un mandatario cu semper ta papia di integridad, awor ta sosteniendo actonan incorecto y castigabel aparentemente.
“No ta for di awor Prome Minister y lider di MEP, Wever Croes, tin un man poni riba cabes di ex Minister Besaril, ya cu e mes a confirma cu e tin un carta cu el a ricibi na luna di Mei di 2021, di un grupo di trahadonan di Arubahuis, kendenan a haci denuncia di algun cos cu Besaril tabata haci y cu lo no tabata corecto of legal.
Evelyn no a menciona algo di esaki durante di campaña electoral mustrando cu kisas e no tabata kier pa un caso asina traha contra di su partido den campaña electoral pero e cos a bira mas straño ora cu e lider di MEP a dicidi di pone Besaril asina mes riba e lista di candidatonan pa eleccion di Juni 2021.
Pues sabiendo cu tin cosnan andando cu no ta bon cu Besaril, no solamente el a pone e ex Minister Plenipotenciario riba su lista pero despues di eleccion a dicidi di bolbe nombra e mesun persona na cabes di mesun Ministerio pa cual tin sospecho cu el a haci cosnan robes.
Tur hende, hasta den seno di partido MEP, a kere cu Ady Thijssen lo a keda nombra como Minister Plenipotenciario pero aparentemente tin indicacion cu a pidi Thijssen pa warda un tiki, a haci su persona contento despues c’un nombracion como respresentante na Brussel.
Tabata bisto cu Minister Presidente Evelyn no kier tuma ningun medida, mescos cu el a haci den caso di Allan Howell, caminda el a manda su gobierno cas, loke ta mustra bon cla cu un di nan tin algo di sconde, un di nan sa algo cu e otro ta sinti su mes incomodo si esaki Sali den publicidad.
E siman aki un biaha mas por a scucha Prome Minister trata di elimina tur sospecho riba loke Besaril a haci, insistiendo cu no tin denuncia oficial, cu no tin investigacion oficial tratando di scapa cara di su gobierno cu ta colmo di cantidad di asuntonan incorecto.
Lo ta bon pa e caso aki di Besaril y su maneho hiba na Arubahuis, haya e nomber mescos cu otro casonan, como “BESA-EWC” y cu husticia tin cu prevalece den esaki, contrario na otro casonan caminda politica a bira e base con institucionnan hudicial ta haya nan mes envolvi aden,” Parlamentario Arthur Dowers a declara.