Na Hulandes tin un dicho cu ta cuadra cu loke Prome Minister Evelyn Wegver Croes a bisa cu e ta “bezig” cune cu Hulanda, negociando pa evita un ‘aanwijzing’ pa su gobierno y e dicho aki ta bisa lo siguiente: “als de vos de passie preekt boer pas op je ganzen.”
Miembro di fraccion di AVP, sr Arthur Dowers ta kere cu for di momento cu Prome Minister y lider di MEP, Eveluyn Waever Croes dicidi di bay Hulanda cu vacacion y durante di e tempo aki, reuni cu Presidente di CAft y Secretario di Estado, ta algo serio ta pasando.
Segun parlamentario Dowers, for di momento cu Prome Minister bisa cu e ta hibando combersacion pa evita un “aanwijzing” esey ta nifica cu debidamente tin un medida asina riba mesa y cu practicamente e lo bira algo oficial dentro di algun siman ora cu RMR reuni atrobe.
“Loke a resalta di e vacacion di Prome Minister, ta e hecho cu e kier mustra pueblo cu hasta den su vacacion y e ta trahando pa Aruba pero e problema cu Hulanda y cu CAft, ta pa motibo cu desde 2018 cu el a firma e protocol cu Hulanda, su prome gobierno y tampoco e di dos actual, a cumpli cu palabracionnan haci.
Pesey pais Aruba ta den un situacion asina dificil y ta loke CAft a bin ta mustra Ev elyn y Xiomara na cantidad di ocasion esta cu nos isla ta recuperando, nos isla su turismo ta impresionante pero pa pueblo no tin algo drechi.
Hulanda y CAft ta mirando e recuperacion aki tumando luga pero e problema mas grandi ta kico gobierno di Prome Minister Wever Croes ta haciendo cu e placa aki, ya cu pa pueblo e placa no ta bay.
CAft den su peticion na RMR a solicita pa duna gabinete Weve Croes un aanwijzing pa motibo di mal gobernacion, pa motibo di falta di seriedad na momento di no cumpli cu acuerdonan cu a firma pa esakinan.
CAft no ta kere cu ta pueblo tin cu paga tur bes pa medio di medidanan cu e abuso cu gabinete Wever Croes a bin ta cometiendo den ultimo cinco aña, mientras cu mesun grupito di semper liga na gobierno, liga na famia di Prome Minister, liga na partido MEP, ta esunnan cu ta gosando di e recuperacion economico cu ta papiando di dje.
Ora Evelyn bin dilanti y bisa pueblo cu e ta negociando cu Hulanda, ta mas cu claro cu pueblo ta sinti temor grandi, temor cu gabinete Wever Croes lo bolbe ranca na su cartera manera ta e custumber ultimo cinco aña.
Ora cu nos mira por ehempel cu director di Utilities NV ta bin dilanti y ta anuncia construccion di otro parke di molina, e ta bolbe mustra cu aki ta tumando decisionnan pa sirbi un of otro interes pero no e interes general.
Nada ta cambia cu e partido y gobierno di Evelyn Wever Croes y mesun famia, mesun amigonan mesun sponsornan, ta sigui progresa mientras cu pueblo ta pega den su pobresa, den su inflacion,” Parlamentario Arthur Dowers a declara.
