E pais tin retonan grandi pa atende, no tin placa y no tin presupuesto y Hulanda a dicidi di wanta ayudo financiero pa Aruba pero ora cu ripara e comportacion di gabinete Wever Croes II, practicamente e pais no tin problema algun.
Parlamentario Arthur Dowers a mustra cu ministernan a bay cu vacacion, sin cu nan a logra di alivia e dolor di pueblo den e mas minimo forma, Prome Minister tambe lo a biaha pa sosega pero pueblo tur fin di siman cu e drenta un luga pa cumpa algo, ta ripara un aumento di prijs di dos pa tres florin.
“Un gobierno cu a priminti cu nan lo goberna pa pueblo, lo pecura pa solucionnan simplemente no tey pa pueblo y casi un luna despues di a huramenta, ainda no a presenta pueblo ningun solucion pa e presion grandi di tur dia cu casnan di famia ta confrontando.
Tur dia, tur momento y na unda cu bira, ta haya ciudadanonan a mustrando riba nan situacion financiero dificil cu nan tin, caminda placa no ta yega pa sobrebibi y pa pone cuminda riba mesa manera tabata antes.
Sinembargo kico por mira di e gobierno di Prome Minister Evelyn Wever Croes, ta cu nan tabatin tempo pa bin parlamento cu dos minister cu reputacion dudoso tratando di limpia nan imagen controversial cu pueblo sa cu nan tin pero sin presenta algo positivo pa pueblo.
No tin nada pa pueblo, no tin solucion pa hendenan cu ainda no tin trabou, cu no ta cobrando nan salario completo pero esaki no por ta otro, ya cu gobierno mes no tin placa mas, ya cu pa falta di seriedad pa ehecuta medidanan cu gobierno mes a bisa cu e lo tuma, Hulanda a pone Aruba riba un wachtlijst.
Mientras cu CAFT a pidi Conseho di Minister di Reino pa no duna Aruba e ayudo financiero pa ultimo parti di 2021, na mes momento e comision di supervision a pone bon cla cu gabinete Wever Croes tin cu cumpli cu e 60 miyon di reduccion di costo den AZV y cu e placa aki mester ta for di e sector di cuido.
Falta dos siman pa RMR bolbe reuni na Den Haag pa mira si gabinete Wever Croes a logra den su intento pa reduci e gastonan pero pueblo ni parlamento tin ningun nocion con gobierno lo haci esaki ya cu practicamente no tin gobierno manehando e pais y ta solamente algun Minister cu practicamente algun no tin ni autorisacion legal pa atende asunto di cierto ministerionan, ya cu ainda gobierno no a trece cambio den e LIM.
Un caos total y e lider di MEP cu ta Prome Minister, por haci loke cu e kier, con cu e kier y a cu e tin un partner di coalicion e biaha aki, cu ta parce un ‘lamchi’ inocente cu no sa mes con e tin cu goberna y ta loke Prome Minster instrui su persona pa haci, e ta haci.
Ursell Arends a ser duna un ministerio nobo cu tin cu atende cu asuntonan di adultonan mayor, un ministerio cu no ta existi legalmente ainda pero parce cu e lider di RAIZ ta masha contento cu esaki pero ainda su gobierno no kier bin afo y bisa tur hende, sigur e adultonan mayor tambe, cu nan lo tin cu bay paga AZV un “eigenbijdrage” y cu nan lo tin cu paga pa gran parti di remedinan cu nan tin mester ya cu AZV lo no cubri esakinan mas,” Parlamentario Arthur Dowers a declara.