“Ora bo ta un lider mal bruha, semper lo bo keda un lider incapacita, mentiroso y sin piedad pa hendenan cu bo gobierno mester a yega ultimo cinco añanan.
For di prome dia cu Evelyn Wever Croes a huramenta pa bira Prome Minister na 2017, pueblo a conoce e cara berdadero di un lider politico cu nunca a sinti e menos berguensa di traiciona su propio pueblo, kedando sin cumpli cu promesanan haci den campaña electoral,” Parlamentario Arthur Dowers a declara.
No solamente como Prome Minister y su gobierno a keda sin cumpli cu cantidad di promesa haci manera reducion di prijs di awa y coriente, reduccion di prijs di gasolin, soluciona situacion financiero di gobierno sin tuma medida contra pueblo, brinda pueblo e miho cuido medico cu por tin pero Evelyn y su gobierno a haci totalmente diferente, Dowers a sigui bisa.
“Pueblo conoce e mentiranan aki bon ya cu awe confrontando asina hopi reto, ainda e Prome Minister aki ta sigui insisti pa sigui bruha pueblo, sigui gaña cu ta pandemia cu Rusia y Ukraina ta e culpabelnan di e situacioin dificil cu pueblo ta pasando aden.
Awor cu gremionan sindical y comercial a fiha un posicion mas concreto y mas decidido contra di un maneho desastroso di gabinete Wever Croes, gobierno a cuminsa ripara cu cosnan no por sigui asina.
Diadomingo atardi AVP a tene un reunion na Cas di Partido caminda tambe pueblo a acudi for di tur bario, dunando directiva di partido, mandato pa cuminsa cu accion, pa uni e pueblo den su totalidad pa caba cu e abuso cu ta wordo impone riba pueblo cu tanto medida.
No ta caso di Benny Sevinger ta motibo di accionnan den proximo dianan pero ta un maneho sin misericordia contra pueblo di Aruba ta motibo di e accionnan aki.
Caso di Benny Sevinger tin fecha caba stipula, e proceso ta canando pa varios aña caba y Evelyn sa esey masha bon pero awor kier sconde tras di otro mentira, tras di su fracasonan contra un pueblo cu no merece esaki.
Na momento cu Evelyn tuma placa di trahadonan publico pa supuestamente yuda den Fase pa esunnan cu a perde trabou den sector priva, pa despues uza e placa aki sin autorisacion di trahadonan publico pa yena buraco den su presupuesto, esey ta loke Evelyn kier purba di haci un biaha mas.
E ta papia di retonan serio pero e unico reto grandi cu tin den e pais aki, ta e lucha contra di inflacion, crea mas tanto pa influencianan den exterior parti particularmente pa un maneho desastroso di gabinete Wever Croes, firmando acuerdo cu Hulanda y CAft cu e no kier cumpli cu nan.
Evelyn y su gobierno ta bibando den cartera di pueblo y cifranan di Banco Centreal di Aruba, ta confirma esaki pero awor e ta presenta un aumento di tarifa di faya y coriente y riba dje ta presenta un plan diabolico pa aumenta BBO cy 1% te cu 1.5%, cu lo bira un munstro cu lo ta mas grandi cu de BTW cu mester a drenta na luna di Januari proximo.
No pensa mes cu e accionnan aki cu ta na caminda, cu ta sigui crece tur dia Evelyn Wever Croes, ta accionnan pa para abuso di un gobierno cu ta gobernando pa un grupito di ‘friends and family’ lagando pueblo na merced di un inflacion crea mas tanto pa incapacidad di su gobierno,” Parlamentario Arthur Dowers a declara.