ORANJESTAD,Aruba
Para dilanti di edificio di DIMAS den Oranjestad, miembro di fraccion di AVP, sr Arthur Dowers a mustra cu lo ta bon pa gabinete Wever Croes realisa nan mes, cu dificilmente lo por sconde proyectonan cu a wordo ehecuta bou gobernacion di partido AVP y unda e fondonan a bay.
“Nos ta para aki dilanti di DIMAS awe pa ilustra kico nos gobierno a haci cu placa di pueblo, ya cu e edificio aki tin un historia politico su tras con un gobierno simplemente no tin respet pa propiedadnan di pueblo y simplemente ta dicidi di laga cos para y busca un forma pa yuda friends and family.
E edificio aki manera pueblo por corda, a wordo bandona pa gobierno di MEP, caminda nan a bay laga e edificio aki bandona, a laga coriente y telefon sin desconecta y pa colmo lagando cantidad di informacion di ciudadanonan benta eyden.
Chollernan despues di algun tempo a drenta den e luga, a haci yamadanan internacional ya cu gobierno di MEP no tabata kibra cabes cu loke ta na interes di pueblo pero pa amigo- y famianan si tabatin cantidad di contract cla pa wordo otorga.
E mesun forma di proceder robes aki pueblo a conoce tambe ora cu otro gobierno di MEP den pasado a laga e cas historico den centro di Oranjestad, cu awe ta conoce cono Stadhuis, bay perdi y cu a wordo ocupa pa chollernan cu hasta a bay over na kima e luga aki.
Awe e cas di pueblo aki ta un joya den centro di Oranjestad, di historia di nos pais y cu ta wordo hopi contempla pa bishitantenan, principalmente esunnan cu ta yega cu cruceronan.
E edificio di DIMAS aki a wordo laga pa su cuenta, practicamente entrega na chollernan y ta mesun gobierno di MEP aki a dicidi di firma un contract pa mas cu cinco aña c’un ruina di Hotel Central pa acomoda ambulantenan cu tabata problema cu droga.
Un contract cu a costa pueblo miyones di florin cu a bay pa famia di e Prome Minister di e gobierno di awe, miyones y riba esey nunca ta papia of ta yama reunion pa mira con esaki tabata posibel.
E edificio di DIMAS aki ta mustra e diferencia di vision di un gobierno di AVP y uno di MEP caminda pueblo por mira e gran diferencia cu tin, caminda nos gobierno a inverti den scolnan, den edificionan pa duna miho servicio na pueblo den barionan pa medio di edificionan di MFA, den embeyecimento di centro di nos ciudad.
Semper proyectonan cu ta sirbi interes di pueblo pero no loke gabinete Wever Croes ta haciendo, esta di gasta miles y miles di florin na un helikopter cu no ta efectivo, na huurmento di eficio di sponsor di un partido y otro contractnan cu no ta na interes di pueblo.
Dos aña gabinete Wever Croes ta na mando pero ainda no por a presenta ningun proyecto na interes di pueblo y tampoco tin proyecto pa wordo ehecuta den 2020 pero mientras tanto pa final di e aña aki, gobierno lo a ranca casi 400 miyon for di cartera di pueblo y tur esaki sin duna pueblo algo bek.
E momento ta yegando cu pueblo lo bay lanta y bay para dilanti di oficina di gobierno pa no solamente exigi pa e abusonan aki caba pero pa pidi su placa bek y pone un fin cu e miyones cu ta bay pa cumpli cu sponsornan y sostenedonan di partido cu ta wordo emplea na gran cantidad,” Parlamentario Arthur Dowers a declara.
