Mester tuna credito na e dos lidernan di gabinete Wever Croes, esta Evelyn Wever Croes y Ursell Arends, lidernan di e partidonan cu ta formadno e actual gobierno di coalicion, ya cu ayera den un conferencia di prensa a bolbe confirma sin berguensa algun, nan curashi pa sigui gaña pueblo riba nan maneho.
Parlamentario Arthur Dowers a mustra cu ta impresionante cu un Prome Minister di e pais y un Minister di Integridad, ta bin dilanti pa informa pueblo di un decision cu nan a tuma, relaciona cu nan propio decision tuma den pasado.
“Nos a custuma cu Prome Minister Evelyn ya no tin gevoel mas ora cu e tin cu gaña pueblo, ya cu ta for di 2017 el a bin ta priminti pueblo tur cos pero a duna pueblo ningun cos y e ta sigui insisti pa haci esaki.
E gran noticia cu e dos mandatarionan a bin informa pueblo di dje, ta cu nan gobierno lo no introduci e medida di BTW dia prome di Januari 2023 mas cual por cierto ta un vision di mesun prome minister aki di Aruba, ya cu a gobierno di Evelyn a presenta e idea aki na CAft y Hulanda.
Diahuebs merdia el a para firme pa mustra pueblo cu e no ta kere cu na e momentonan aki, por presiona pueblo mas ainda pa duna un placa cu pueblo no tin, hungando e rol di salbado pero ta tres siman pasa su gobierno a dicidi di bay di acuerdo cu WEB pa aumenta tarifa di awa y coriente contra mesun pueblo aki.
Ta increibel pa scucha e dos mandatarionan aki, trata di hunga e rol di heroe pero na mes momento ta trata di convence pueblo cu na luga di e BTW, gabinete WEver Croes II, lo introduci un aumento di BBO di 1%b te cu 1.5% cu lo nifica cu pueblo lo tin cu paga mas impuesto tog y cu e aumento aki lo tin cu consecuencianan.
Den un forma bergonsoso Prome Minister a dicidi di trata di hustifica gobierno su decision, dor di entre otro bisa cu e amento di BBO, lo produci mesun 100 miyon cu e BTW lo a produci si e wordo introduci na 2023 y ta lanta e pregunta e ora ta di con ta kita un medida y ta pone otro medida cu lo ranca mesun cantidad di placa for di pueblo y for di comercio.
Esaki ta un gobierno cu ta kita un tire plat patras y kita un yen dilanti y pone e plat dilanti, ya cu di tur dos forma, pueblo tin cu paga mas placa, pueblo ta wordo castiga pero e tipo di ideanan briyando y bobo aki, ta solamente un gobierno asina malo por haci esaki.
No tin sentido cu ta dicidi di no introduci BTW pero ta bay over na aumenta BBO caminda gobierno por haya ainda mas placa su tuma na consideracion tur e schakelnan cu tin den e ley aki pa wordo cubri.
Ta tristo pa mira un Minister di Integridad, para banda di un Prome Minister cu Ursell sa masha bon cu e no ta sincero cu pueblo, scucha y acepta e tipo di abuso nan aki contra pueblo,” Parlamentario Arthur Dowers a declara.