ORANJESTAD,Aruba
Siman pasa gobierno a dirigi un carta na Parlamento, haciendo un solicitud pa e organo aki sigui ehempel di gabinete Wever Croes, pa bay di acuerdo c’un reduccion di salario pa asina duna un aporte na situacion financiero cu e pais ta pasando aden.
Arthur Dowers di fraccion di AVP a mustra cu diaranson anochi no solamente Parlamento a cumpli cu esaki pero na mes momento a manda un mensahe cla pa gobierno, caminda Parlamento a aproba den forma unanime, un reduccion di salario di 25%.
“Fracciobn di AVP semper a duna sosten na cualkier causa cu ta na interes di e pais y di pueblo y pa tal motibo despues di hopi discucion entre e fraccionnan mes cu ta sostene gobierno, riba kico tin cu entrega of no, nos fraccion di AVP a presen un amienda diamars atardi den cual ta pidi pa un reduccion salarial di 25%.
Diaranson na momento di vota pa e amienda aki, e fraccionnan di gobierno a mira e necesidad pa sostene e mocion aki pa asina parlamento duna un aporte importante den momentonan di crisis serio ocasiona pa e covid-19.
Aki ta bon pa subraya cu e decision aki aproba pa Parlamento riba reduccion di 25%, mester sirbi awor como ehempel pa gabinete Wever Croes pa nan tambe sigui nos ehempel y tambe bay over na reduccion di 25% na luga di e 20% cu inicialmente nan a anuncia di lo entrega.
E situacion cu pueblo ta pasando aden ta pidi pa esaki y nos ta spera cu gobierno bin para banda di Parlamento y haci mesun gesto aki pa asina duna mas contenido na henter e proceso aki pa yuda alivia e situacion financiero den e crisis aki,” Parlamentario Arthur Dowers a señala.
