Parlamentario Arthur Dowers di fraccion di AVP a mustra durante conferencia di prensa cu un biaha mas por tuma nota di e ‘buikspreker’ di Nelson Orlando Oduber, esta su yiu Dangui Oduber, ta duna declaracionnan cu ta mentira y mas cu tur cos e ta trata di hinca partido AVP den e rotzooi cu el a bin a haciendo na aeropuerto.
“Simplementa ta inhusto cu Minister Dangi Oduber ta haciendo cosnan inhusto contra trrahadonan di aeropuerto, caminda e ta gaña nan y riba dje ta denuncia cu ta AVP lo ta mete den maneho di aeropuerto, no solamente gañando pero hungando cu sentimento di e trahadonan.”
Sr Dowers a sigui splica cu algun siman pasa tabatin combersacion cu diferente persona di aeropuerto caminda informacion a wordo duna na Parlamento, caminda aeropuerto a tuma e decision, cu nan ta bay kita diferente trahado di aeropuerto.
Segun e miembro di fraccion di AVP, e dia ey Minister Dangi Oduber a core sali y bisa cu su persona no a tuma ningun hende den servicio di aeropuerto pero cu ta AVP a nombra 45 trahado na triple A den ocho aña.
“Riba dje Minister Dangui ta bira ripiti e barbaridad aki durante tratamento di presupuesto supletorio dialuna ultimo caminda el a duna e impresion cu e ta hibando un pelea, caminda awor cu su primo a sali for di coalicion el a haya curashi.
Awor ta parce cu e ta buscando un pelea cu su primo Otmar Oduber bisando cu Otmar a nombra 45 persona na aeropuerto durante ultimo ocho aña.
Awor si ta berdad cu Otmar nombra 45 persona den ocho aña di gobernacion di AVP, esaki ta hopi mas decente compara cu loke Minister Dangui a bin ta haciendo.
Informacion cu fraccion di AVP ta dispone di dje, ta mustra cu bou di maneho di Minister Dangui 30 persona a wordo nombra tur aña mustrando cu el a nombra mas cu 100% mas hende den tres aña cu e ta minister compar cu Otmar den ocho aña.
Anto por conclui cu Dangui Oduber ta tira santo den wowo di pueblo, ta engaña pueblo ya cu e tin un agenda scondi, cual agenda ta mustra cu e kier kita hende for di aeropuerto na e momentonan aki, pa despues ora cu ta mas cerca di campaña, e nombra su hendenan.
Minister mester ta honesto y mustra mas respet pa pueblo y pa trahadonan di aeropuerto, ya cu cartanan cu a sali di aeropuerto mes ta bisa cu nan tabatin un ‘revenue’ den 2019 di 1.2 biyon florin y aeropuerto su presupuesto ta uno compara cu un pais chikito anto ta bin bisa cu ta kitando trahadonan aworaki pa motibo cu AVP a nombra nan?
Ta bon pa ilustra akinan cu AVP no tin arte ni parte den e bagamunderia cu a bin ta tumando luga den e gobernacion aki, ya cu nan tin tres aña den gobierno, den cual periodo nan a nombra un gran cantidad di hende, loke a wordo denuncia pa sindicato di trahadonan di aeropuerto cu partido MEP y Dangui Oduber a bin ta nombrando hende.
Dangui Oduber no por bin gaña ya cu tur hende sa cu e yiu di su partido a wordo nombra na aeropuerto y awo si e tin derecho di wordo nombra eynan, mi ta duda y loke ta importante den esaki a cu e persona ey no a wordo nombra dor di AVP.
Awo si Dangui Oduber ta bisa cu e no a nombra ningun hende, anto e ora ta lanta e pregunta ta kende ta esun of esnan cu ta nombrando hende na aeropuerto bou di su responsabilidad?
Tin 30 hende a wordo nombra den cada tres añanan cu Dangui ta Minister y riba dje tin hende nombra eynan cu ta hendenan hopi cerca di su partido cu simplemente Dangui no por hustifica cu ta AVP a nombra nan.
Si bo kier ta Minister, bo mester carga responsabilidad como Minister y no bin pafo y bin pretende awor cu ta AVP a nombra hende cu bo gobierno kier manda cas ya cu no por hustifica c’un compania cu tin un revenue di 1.2 biyon florin, ta mandando hende cas di e forma cu esaki a bin ta tumando luga.
No solamente Minister Dangui ta sinta gaña riba hendenan cu a wordo tuma den servicio pero tambe ta bira gaña manera un mucha chikito cu e no sa algo di retiro di e trahadonan y cu e ta bay para e retironan aki.
Sinembargo Triple A den un carta a mustra bon cla cu e decisionnan aki, entre otro riba retiro di trahadonan, a wordo tuma dor di gerencia, hunta di comisario y cu minister encarga, pues debidamente Dangui ta bon na altura di e proceso cu tin actualmente pa manda hende cas.
Ta tristo cu no solamente den e gobierno actual tin ministernan cu a wordo acusa di actonan coruptivo pa un colega di nan cu mientras tanto na a core cune pero awor ta sali na cla cu Minister Dangui Oduber ta sinta gaña trahadonan cu e lo salvaguardia nan trabou na aeropuerto, mientras cu e decision pa manda e hendenan aki cas, ta definitivo y cuestion di tempo,” Parlamentario Arthur Dowers a declara.