ORANJESTAD,Aruba
No ta custumber di mira miembronan di fraccionnan cu ta sostene gobierno, vota na fabor di un amienda of un mocion cu fraccion di oposicion AVP presenta durante di tratamento di cualkier ley den Parlamento.
Sinembargo diaranson anochi den forma unanime Parlamento a sostene e amienda di AVP cu a pidi pa un reduccion salarial di 25% mas otro beneficionan pa asina duna un aporte na e crisis financiero y economico cu e pais ta pasando aden na e momentonan aki.
“Sin duda cu fraccion di AVP a bolbe presenta otro amienda cu ta na interes general y den ultimo dos aña y mey, constantemente nos a presenta amienda y mocion riba diferente ley pero cu fraccionnan cu a sostene gobierno, no kier a bay di acuerdo, apesar cu tur esakinan tabata pa sirbi interes di pueblo.
Loke hasta a resalta tabata di un miembro di fraccion di MEP, kende semper a grita den reunionnan cu hamas den su bida su persona lo pone su firma di sosten bou di un amienda di fraccion di AVP, e biaha aki a firma mirando cu e amienda aki ta na su luga y corecto.
No ta momento a hunga wega, en realidad ningun momento mester hunga weganan politico ridiculo dos di bay contra di un mocion of amienda, simplemente pa motibo cu ta fraccion di oposicion a presenta esakinan, pero tin cu mira si e ta na interes di pueblo, na e interes general.
Awor ta keda na gabinete Wever Croes pa sigui e ehempel cu Parlamento a duna pa medio di AVP su amienda y nan tambe bay over na reduci nan salario cu 25%,” Parlamentario Arthur Dowers a declara.
