Pa pueblo no tin tempo, no tin solucion y no tin alivio pero tanto pa loke ta e grupo grandi di ‘friends and family’ y bufete di abogado di Papa, si tin tur posibilidad pa sigui bira rico riba sufrimento di pueblo.
Parlamentario di fraccion di AVP, Arthur Dowers ta mustra c’un biaha mas gabinete Wever Croes ta demostra cu hamas y nunca e tin pueblo prome cu tur cos ya cu practicamente tur decision cu tin di haber cu gana placa, ta pa nan hendenan y pa pueblo ta medida so tin riba agenda.
“Henter un comedia un biaha mas caminda cinco minister y shete parlamentario marioneta ta trata di bende pueblo un 6 pa un 9 y ta haci esaki den un forma asina ofensivo caminda cu realmente e gobierno di Prome Minister Evelyn no tin berguensa mas cu pueblo sa cu nan ta gaña.
Awor a organisa un evento di algun minuut den Convention Center pa informa pueblo cu “Lotto pa Deporte ta di Aruba atrobe,” sugeriendo cu lo a yega na un acuerdo cu ‘Canadian Bank Note’ sabiendo cu ningun momento a yega na un acuerdo cu e banco menciona.
Ora cu scucha declaracion di Minister Endy Croes papia di un ‘logro” ta mescos cu mira un pushi para dilanti di un aquarium sperando e momento yega pa e come tur pisca.
Henter e scenario aki dialuna ultimo, esaki ta di dos ocasion cu ministernan di gabinete Wever I y II ta usa e grito di “rescata” un compania cu ta pertenece na pueblo, ya cu ta mesun grito Prome Minister a usa ora cu dos aña y mey pasa, a kibra e contract cu CITGO.
E tempo ey tambe a informa pueblo cu “refineria ta bek den man di pueblo” pero awe e refineria ta sigui putri bay perdi ya cu su gobierno no a haci algo pa desaroyo esaki.
Awor ta mesun grito bashi di triunfo di mesun gobierno aki, gritando cu “lotto ta bek den man di pueblo” mientras cu tur cos ta mustra cu no tin acuerdo ainda, algo cu e propio gobierno mes a confirma ora cu a nombra un comision pa bay negocia cu Canadian Bank Note.
Cu e logro di CITGO gobierno di Evelyn a permiti e compania aki bay sin paga 300 miyon dollar cu nan mester a paga pa kibra e contract pero den tur dos proceso tanto di lotto como refineria, tin un bufete di abogado di Papa di Prome Minister cu tabata envolvi den e procesonan aki.
Awor un biaha mas por mira presencia di abogado Anthony Ruiz di Bufete Croes, Wever & Ruiz envolvi den e team negociado pa bay atende cu Canadian Bank Note y cu sigur ta cobra pa su servicionan mustrando un biaha mas con placa di pueblo a wordo reparti entre friends and family.
Ta mesun abogado Anthony Ruiz aki, a negocia cu CITGO pa asina kibra e contract cu tabatin y cu a pone cu pais Aruba a perde 300 miyon dollar pero e bufete si a gana su placa bon gana y cu e gabinete Wever Croes, nunca e bufete aki lo sali perdi,” Parlamentario Arthur Dowers a declara.