Criminalidad bou di hobennan no ta un problema di/of pa solamente Minister di Husticia. E ta un cadena di instancianan cu mester duna di nan banda pa yuda mantene hobennan riba e bon caminda. P’esey dialuna ultimo den reunion publico di Parlamento, mi tabata kier sa for di Minister di Husticia Rocco Tjon con e Mandatario tin planea pa mehora e ‘handhaving’ bou di e circunstancianan di scarsedad cu nos tin awo? Con ta planea pa haci e aparato di husticia mas efectivo y eficiente na bienestar di siguridad di nos hobennan? Esaki ta preguntanan cu Parlamentario Alvin Molina a haci na e Mandatario encarga cu husticia.
Den e reunion publico di dialuna ultimo criminalidad hubenil tabata e tema principal cual tabata un topico hopi importante pa mi persona. No solamente pasobra mi tabata kier a haya sa for di e Mandatario su plan pa ataca / frena criminalidad bou di hobennan y expresa mi preocupacion. Pero Alabes señala cu no ta un persona of un instancia so ta responsabel pa mantene nos hobennan riba bon caminda, pero e ta un cadena di instancia’, Molina a expresa.
E Minister di Husticia naturalmente ta responsabel pa siguridad general na Aruba cu un bon vision, maneho y cu cooperacion estrecho cu tur instancianan den e veld di Huisticia nos lo por frena criminalidad na Aruba. Pero no solamente e Minister ta responsabel, e juffrouw di scol naturalmente no por neglisha su alumnonan y mester keda semper tira un bista riba nan, ademas di duna les. Pero tambe e mayor. Un mayor tambe tin su responsabilidad pa cuida di su yiu(nan) y no pasa tur su tempo riba caya, fiesta of uza alcohol. Asina tambe por menciona un coach cu ta un lider y ta duna guia, banda di e parti deportivo, na e mucha hobennan cu ta bou di su cuido. Tin masha hopi ehempel cu cada persona como parti di e comunidad aki por causa inseguridad pa hobennan pero tambe percura cu e hobennan ta “safe”. Ken no a yega di tende e frase “It’s take a village to raise a child”. Esey ta e mentalidad cu nos mester provee pa crea generacionnan di hobennan sano.
Den cuadro di esaki, Parlamentario Molina a expresa su gratitud y elogio na tur esnan cu di un of otro manera ta contribui ne desaroyo positivo aki. Molina a sigui bisa; mi ta pensa riba centronan di bario, clubnan deportivo, inglesianan, organisacionnan di boluntario, ‘scouting’, etc. Den esaki e Ombudsman cu no a logra incorpor’e den nos Constitucion manera tabata desea, tambe lo a hunga un rol importante.
P’esey mi ta na fabor di e proyecto di Hotel Secrets na Baby Beach. E lo percura pa no solamente mayornan, cu ta biba pariba y traha na Palm Beach, cu lo spaar basta placa den transporte cu nan por uza pa gastonan familiar, pero tambe e ta percura pa tempo di calidad cu ta nan por dedica na e yiunan. Tres ora adicional en bes di uza esaki den e biahe pa trabou y regreso, awo mama y tatanan por uza esaki pa dedica mas tempo na nan yiunan. Hotel Secrets ademas di faborece economia di San Nicolas en particular tin su parti social tambe positivo.
Den cuadro di esaki mi a entrega dos mocion durante e reunion di Parlamento. E prome ta pusha pa baha criminalidad den barionan bou di e hobennan; duna prioridad na e proyecto di polis di bario. Esaki ta encera yena e vacaturanan necesario, organisa e cursonan necesario pa personal di e departamento aki y naturalmente haya e materialnan necesario pa nan por funciona.
E otro mocion ta papia pa a corto plaso haci entrega di armanan di candela (di bo of di otro hende) sin haya castigo of wordo persigui pa esaki. E mocion aki a haya apoyo unanime den Parlamento.
Mi no kier bagatelisa e responsabilidad/influencia cu e Mnister di Husticia tin riba e siguridad di nos muchanan y criminalidad cu ta wordo cometi door nos hobennan. Prevencion den mi opinion ta e miho manera pa tene nos pais sigur’, Molina a expresa. Den cuadro di esaki mi a haci algun pregunta ne Mandatario riba su maneho preventivo pa evita cu hobennan ta sigui bay den mal caminda, con ta evita pa hobennan ta bira victima di criminalidad, wordo herida fisicamente / mentalmente, of hasta haya nan morto. E parlamentario ta bisa cu e ta consciente cu mantencion di leynan ta un reto door di falta di capacidad den tur departamento di Husticia. Pa esaki el a pidi un plan pa un uzo mas eficiente di loke tin disponibel na e momentonan aki.