Cuminda ta primordial pa nos como ser humano por biba. Pa nos por hiba un bida mas optimal y sano posibel, e cuminda mester ta di bon calidad, tin un bon prijs y ta disponibel constantemente. Durante pandemia y te awe ainda nos por mira con importante y con fragil tur e tres puntonan ta. Web’i galiña y lechuga ta dos ehempel cu a haya atencion den media, pero asina tin hopi mas. Danki na esfuersonan di agricultornan local nos por mira poco poco cu cierto producto ta di miho calidad y pa un prijs mas rasonabel, pero ainda por mira cu falta basta. Claro, inversionista mester “step forward” pa crea e industria, nos hendenan local mester haci e trabou di planta, pero gobierno sigur tin un tarea grandi pa promove e industria di agricultura. Diferente departamento di gobierno mester wordo envolvi den e desaroyo aki: Santa Rosa, DIP, WEB, Dimas, Douane, DOW, labor, enseñansa, DVG, etc. Kisas e proyecto aki por wordo carga door di Ministerio di Agricultura, Economia, Innovacion, Salubridad Publico, kisas un colaboracion entre varios Ministerio. P’ami, como Parlamentario, e no ta haci diferencia cua gobernante haci’e, tanten cu gobierno tuma e pasonan necesario pa pueblo di Aruba por ta sigur di bon alimento na un bon prijs. Maart aña pasa mi a entrega un mocion, pidiendo atencion pa e topico aki. E mocion a wordo carga unanimamente door di Parlamento. A yega tempo pa nos por mira un adelanto. Pesey mi a dirigi pregunta na Minister President, como dirigente di gobierno, adhunto e peticion pa tuma e pasonan necesario pa promove e industria innovativo di agricultura.
Parlamentario Alvin Molina (MEP): Accion gubernamental ta rekeri pa garantisa “food security”
