San Nicolas lamentablemente ta conoci como un “ghost town”. Desde cu rafinaderia a cera, a sobra masha tiki di tur e grandesa cu e districto a conoce. Pa drecha un “ghost town” bo mester trece movecion di hende. Carnival Village ta un bunita proyecto cu por trece hopi oportunidad pa cultura y por yuda eleva union den pueblo. Inverti den Carnival Village ta importante, paso cultura, mescos cu musica, arte y deporte, ta trece hende hunto, ta uni e pueblo cu eventualmente lo percura pa e barionan ta mas sigur y dushi pa biba aden. Construi un stage fiho y un muraya lo haci Carnival Village hopi mas apto pa organisa evenemento- y actividadnan.
Den e prome kwartaal di 2022, mi a entrega un mocion pa eleva celebracion di cultura pariba di brug. Tambe, mi a puntra pa e plan original di Carnival Village pa nos mira kiko falta y determina con mester sigui. Nos Minister di Infrastructura a haci varios intento, a acerca DIP, pero te dia di awe no a ricibi nada. A bira tempo pa traha un plan nobo, basa riba e deseo di pueblo. Den tratamento di Presupuesto di Pais Aruba pa 2024 mi a entrega un otro mocion specificamente pa drecha Carnival Village, pa construi un stage fiho y muraya. Asina promotornan por organisa evento, kiosconan por sobrevivi y sigui brinda servicio na nan cliente. Mi lo keda monitor di cerca si e mocion ta wordo ehecuta y con. “ I will be on they tail believe me”.
Por mira cu varios minister a reacciona positivo y ta sostene mi peticion. Minister di Cultura ya ta trahando riba e plan cu lo wordo ehecuta e aña aki, Minister di Infrastructura y Minister di Turismo ta duna nan cooperacion y aporte. Accion di gobierno y di pueblo ta rekeri pa yuda ‘make San Nicolas great again’.
