Ningun reto cu un país ta pasando aden, ta nifica cu mester lubida riba aspectonan importante cu ta crea un generación sano: deporte. Awe nos ta para aki na e cancha di basketball den Village. Un ehempel bibo di e forma con no mester lubida facilidadnan deportivo.
Fraccion di MEP den Parlamento tin atencion pa necesidad di e ciudadanonan, banda di e aspectonan financiero y social, nan ta haya cu deporte tambe merece su atencion. Ta por medio di deporte ta crea ciudadanonan disciplina y cu respet.
Un di e areanan cu e ta mira cu mester haya su atencion ta e cancha di basketball den Sint Maartenstraat (VIllage). E ta un bunita cancha cu lamentablemente a keda bay atrás. Por mira cu e basketnan ta tur putri, hekwerk practicamente no-existente, luz daña, e veld mes cu ta tur blikia, gazebo kibra, e bankinan tur na werki.
Kico un situacion asina ta ilustra? E ta crea impresion cerca e hobennan cu nan no bal e atencion of cu nan no merece e atencion. Hobennan cu kier practica deporte tur ta confronta cu e imagen aki di un cancha den estado deplorabel. Mi no por keda sin menciona un teoría conocí cu ta bisa cu mas bo laga un comunidad bay atras, mas e lo sigui bay atras.
P’esey mi ta lamenta masha hopi mes cu a laga e cancha aki cu ta masha importante pa e comunidad di Village, bay atrás di e forma aki. E muchanan di e vecindario merece miho y merece di por sinti nan mes orguyoso di nan cancha di basketball.
Un preocupacion fundamental cu nos tin na Aruba ta con nos por yuda nos hobennan pa desaroya na un manera positivo. Pero mester mira esaki mas bien di otro forma. Pensa con nos por evita pa muchanan bay den mal caminda. Tin yen cos cu ta importante ora ta toca e topico aki, enseñansa/situacion familiar/social/hudicial. Tur esakinan eventualmente tin di haber cu nos siguridad na Aruba. Un caminda e disciplina ta cuminsa y esaki ta den deporte.
Antes tabatin tur fin di siman competencianan deportivo na diferente punto di San Nicolas. E ta percura pa hobennan di pariba topa pa haci algo sano, pero cu diferente di e facilidadnan den decadencia, esaki no ta posibel manera antes.
Hobennan di área di San Nicolas semper a sobresali den deporte, principalmente den areanan di baseball, basketball y volleyball. Ta importante pa sigui mantene interés di hobennan di e barionan di San Nicolas den deporte grandi. Ta logra esaki por medio di upgrading di facilidadnan deportivo of crea otronan nobo. Practica di deporte den barionan por medio di canchanan manera esun di baskeball den Village ta encurasha un miho conexión (relacion) entre famia y comunidad. Cada un lo percura pa tira bista pa e otro y evita cu ta cay den mal caminda.
Sinembargo no mester lubida cu Rosaria ‘saya’ Brown no ta un persona desconoci den e bario y riba cancha di basketball, pa varios aña caba Rosaria ta haci diferente actividad prinsipalmente pa e muchanan di bario aunke cu e situacion di e cancha no ta faborabel. Pero su amor pa mira e muchanan activo y den bon caminda e ta sigui haci diferente actividad.
Mi a haya un oportunidad pa papia cu nos minister di deporte Endy Croes tocante mi preocupacion. Di mes realidad ta cu e espacio riba presupuesto 2022 lo ta hopi limita. Mas limita ainda di loke nos ta custumbra. Pero no mester give-up y sinta spera te ora cu cos ta bon atrobe. Por busca formanan creativo pa toch logra haci por lo menos algo pa e hobennan. Por ehempel, por busca maneranan pa colabora cu otro.
E cancha di basketball den Village por wordo atendí di diferente forma, no specificamente di deporte. Asina e por wordo mira como un punto di encuentro pa comunidad of e por cay bou di infraestructura di bario.
E prome reacción tabata positivo pasobra Minister a informa mi cu e lo sondea con e por colabora cu su
coleganan minister pa por logra drecha e veld.
Gobierno tin su parti pa drecha/mantene e infrastructura. Pero esnan cu ta us’e tambe tin nan responsabilidad pa cuida esaki.
