Diahuebs mainta Parlamento di Aruba a cuminsa cu e di dos dia tratando presupuesto 2022 di Ministerio di Salubridad Publico y Turismo y Ministerio di Transporte, Integridad, Naturalesa y Adultonan Mayor. Molina a cuminsa gradiciendo e ministernan pa nan contesta riba su preguntanan haci por escrito. E Parlamentario a puntra e Mandatario di Turismo pa elabora un poco mas di e plannan pa cu aña 2022 y e desaroyo di turismo pariba di brug pa San Nicolas bira un destino economico competitivo den region.
Molina a sigui bisa cu agricultura ta birando mas y mas importante, un pilar economico nobo, pa yuda haci Aruba mas resiliente. Otro metanan pa promove agricultura local ta pa logra un nivel halto di ‘food security’, importa menos y tin bon bista riba kico ta wordo cultiva.
Pasando den barionan pariba di brug, reuniendo cu diferente ‘farmers’ y ciudadanonan cu tin e deseo pa cuminsa cu agricultura nan a expresa nan preocupacionnan cu ta: tereno, awa, conocimento y material. Agricultura por trece oportunidadnan pa muchanan por haci nan profesion of hobby. Muchanan por pasa nan tempo na un manera positivo, lo tin perspectiva pa un bon trabow y asina menos tempo, smaak y tentacion pa haci cos malo. Aruba lo ta mas sigur.
Concluyendo Molina a enfatisa cu tin necesidad di un representante cu por yuda, guia y duna sosten na esfuersonan pa cultiva. E representante ey tey caba, esta Santa Rosa. Pero Santa Rosa na su turno, tambe tin su retonan, cu ta strobe pa por eherce e funcion aki optimal.
En conexion cu esey Molina a entrega un mocion pa urgi Gobierno pa haci un inventarisacion di e situacion actual di Santa Rosa y presenta un ‘meerjarenplan’ cu mester percura pa Santa Rosa tin e autoridad, material y personal nesecario pa por sostene nos pilar economico nobo.
