Diahuebs anochi despues cu e reunion publico den Parlamento riba e tema di problematica di pesca a termina, Parlamentario Alan Howell a indica cu ta un gran anochi especialmente pa e homber chikito.
E ta indica cu Parlamento ta un luga serio y su meta principal ta pa para tras di su pueblo, di su hendenan humilde. E opinion aki el a vocifere for di siman pasa y contrario na loke algun a pensa cu esaki lo bira un wega of un cherchamento, “ora cu mi para pa algo, mi ta para tras di mi palabra. Nos hendenan humilde, nos piscadornan tabatin mester di un Parlamento cu ta para fuerte patras di nan, un Parlamento cu ta compronde nan dolor”.
Mas aleu Howell a bisa cu diahuebs mes a pasa di un bijeenkomst pa un reunion publico caminda a presenta un mocion y pone mas presion riba gobierno, indicando asina cu Parlamento tin e situacion aki na serio. Na final di e reunion a pasa den forma unanime un di e mocionnan na bienestar di e piscador, urgiendo gobierno pa dentro di 10 dia di trabou por haya un gedoogbeleid pa piscadornan di spearfishing y permiti e personanan aki pone cuminda riba mesa pa nan ser keri.
Alan Howell tin e confiansa cu gobierno lo haci su maximo esfuerso pa keda cla cu e gedoogbeleid dentro di e termino stipula, logrando asina un avance pa esnan cu tin spearfishing como nan ofishi.
