Lider di partido POR a yama un conferencia di prensa dilanti di e caminda principal di San Nicolas pa playa. Lider di POR Alan Howell ta gradici tur hende cu a sostene POR durante di e fin di siman cu a pasa, tanto e ciudadanonan pariba di brug , pero tambe pabao di brug cu a duna nan sosten na su persona y partido POR pa e siguiente eleccion.
Asina tambe por mira cu pueblo ta aproba e trabao cu partido POR a bin ta haci. Partido POR ta un partido cu a crece y pueblo ta sigui duna su respaldo y ta reconoce e trabaonan cu a bin ta haci den gobierno y parlamento. Lider di POR ta pidi pueblo di Aruba e sosten dia 25 di juni proximo pa hunto sigui traha duro pa cada ciudadano riba e pida baranca aki , principalmente e homber chikito cu mas mester di dje.
Tambe lider di POR Alan Howell ta gradici Elmar cu a haci un tremendo trabao pa a trece un solucion specialmente pa e pueblo di pariba di brug, cu pa tanto tempo tabata sclama pa bin cu un solucion pa cu e luznan di caya. Na varios ocasion e parlamentario a suplica gobierno y DOW pa haci algo cu e situacion pero nada no a wordo haci.
E luznan tabata cay bao di DOW pero pa diferente motibo DOW no por a cumpli pa pone e luznan funciona. Sinembargo semper a vocifera y a splica e diferente minister nan cu tabata encarga cu e cartera di infrastructura pa trata di soluciona e problema di e luznan di caminda pa e ciudadanonan di San Nicolas.
E ciudadanonan no ta interesa pa tin luz nan bunita , pero e ciudadano ta interesa pa tin iluminacion cu e luz nan ta traha. Pa basta aña e luznan a keda paga y cu tabata trece un risico grandi na momento cu ciudadanonan ta crusa, sinembargo ningun mandatario di infrastructura a scucha y no a trece un solucion pa e pueblo di San Nicolas, awo cu ta campaña diripiente e luz nan a keda soluciona. Esaki ta un falta di respet pa e comunidad di pariba di brug cu a sufri pa basta tempo y a roga pa basta tempo pa un solucion pa e luz nan di San Nicolas.
DOW no por a cumpli debi cu DOW ta keha cu no tin placa y pa haci cambio na e luznan lo costa Aruba mas di 850 mil florin pa por a haci e proyecto aki di nobo . Lider di POR no a para keto y publicamente a haci e peticion na prome minister Evelyn Wever Croes si DOW no por cumpli cu San Nicolas pa trata di busca un solucion si Elmar por percura di mira e situacion y si e por trece un solucion pa e comunidad cu nan experticio. Esaki ta e caso tambe unda cu Elmar a trece un solucion riba mesa unda cu awe por bisa cu San Nicolas tin iluminacion. Lider di POR Alan Howell ta duna di conoce cu e lo sigui traha pa San Nicolas y e lo keda pone su granito pa mira San Nicolas progresa.
Parlamentario Alan Howell No ta solamente durante di campaña San Nicolas ta existi
