Parlamentario Alan Howell den sala di Parlamento durante reunion publico tratando e tema di Parkietenbos y e incinerator chikito, a indica cu e temanan aki no ta algo nobo.
E ta bisa cu varios biaha a papia riba esaki, a sinta den diferente reunion y comision unda varios experto a trece nan ideanan. Ademas e actual minister mes tin riba 20 aña di experiencia y sigur varios di e puntonan presenta durante e reunion di diaranson mainta no ta algo nobo pe. Inclusive, poco tempo atras Alan Howell mesh unto cu e actual minister, e tempo ey lider di fraccion di POR, a bishita diferente luga y a sinta cu diferente instancia pa atende cu e topico di Parkietenbos.
Pa e motibonan aki mes, Howell a tuma e decision di en bes di realisa un serie di pregunta na Minister Lopez-Tromp, a djis pidie lo siguiente: “loke e habitantenan kier haya sa ta ki solucion tin pa Parkietenbos. Henter pueblo di Aruba kier tende esaki”.
E ta conciente cu e actual minister no tin mucho tempo sinta den e stul ey,pero ta keda na su encargo pa haya un solucion pa e problema grandi di Parkietenbos.
“Habitantenan ta sclama, ta bay corte, ta bira malo…ta inaceptabel pa nos hendenan sigui biba den e condicionnan aki. Tin asina hopi experto, gobierno ta bisa cu tin hende central, pero falta apenas 12 luna pa ciudadanonan bay urna electoral unda lo elegi un gobierno nobo y atrobe no tin un solucion pa nan. Con lo por bay den campaña pa trece cambio pa nan forma di biba y nan salud si te na e momentonan aki no a cumpli. Nos ciudadanonan merece respet y nos mester brindanan e solucion cu nan ta bogando pe pa asina hopi aña”, Alan Howell a expresa.
Finalisando el a bisa cu e ta ancioso pa scucha di e minister ki plannan e tin pa dentro di poco e por trece un alivio pa e ciudandanonan aki. E no tin duda cu e minister kier trece un alivio pa e ciudadanonan aki y el lo desea di scucha con el lo bay atende e situacion aki pa e habitantenandi Parkietenbos y vecindario, pa nos isla, pa nos turistanan y pa nos medio ambiente.
