ORANJESTAD,Aruba
Parlamentario Alan Howell ta considera e ley di iniciativa entrega door di fraccionnan di MEP y RED ta un ” Dead Shot” na su man. Ta trata aki di e inicativa cu nan a entrega pa baha temporalmente salario di parlamentario y ministernan.
Howell ta bisa cu e ley lo no ni yega Parlamento pa wordo trata den un reunion publico. “Nan ta bay haya un les pa no comporta selfish nunca mas. Marca mi palabranan! Basha mi mocion abou pa core traha di bo despues di tres dia den pura y expect mi sosten tambe, esey ta un falta di respet y e flie e no ta bay subi mes. Ami no ta sostene ningun ley di mala fe. Mi ta di opinion y a propone na gobierno cu como parlamentario y minister, mester por entrega mucha mas ainda cu loke MEP, RED y gobierno ta propone cu ta 10% di salario inclusive 50% kita di e vakantie uitkeuring, pa ta solidario cu pueblo. Mi ta di opinion pa kita por lo menos 25% di salario y kita full e vakantie uitkering”.
Loke Fraccion di POR a a propone den e mocion cu no a haya sosten di fraccionnan di MEP y RED 3 siman pasa, tabata hustamente algo pa cuminsa mustra e solidaridad na esnan cu a perde trabou. “E grandinan mester cuminsa cu nan mes prome cu bo bay den saco di e chikitonan. Esey ta keda mi opinion personal”, Alan Howell a comenta.
Na final el a bisa cu el lo keda en espera riba e propuesta nobo di gobierno pa loke ta trata reduccion di salario di minister y parlamentarionan pa mustra en berdad e solidaridad cu nos pueblo.
