ORANJESTAD, Aruba
Parlamentario di POR, Alan Howell durante reunion publico di Parlamento pa trata e rapport “Bo Aruba” realisa pa Contraloria General tocante e proyectonan grandi y e riesgonan di nan durante e periodo di 2010 pa 2016, a mustra bon cla cu gobierno anterior a haya un ‘dikke vieze onvoldoende’.
Na un forma figurativo pa pueblo por compronde e situacion miho, el a bisa den su disertacion cu si e tabata un director di scol el lo mester a bisa su studiante, cual ta e gobernacion anterior, cu el a haya un ‘dikke onvoldoende’y hasta a keda sinta. E ta expresa cu ta facil pa goberna trahando yen di cos luhoso y grandi pa hendenan por wak, pero cualkier persona por compronde awo con fatal e resultado financiero di esakinan ta pa Pais Aruba.
Tur punto menciona den e rapport ta duna gobierno pasa un ‘dikke vieze onvoldoende’, Howell ta expresa. Contraloria General ta menciona den su rapport cu e proyectonan di gobernacion anterior tin efectonan negativo riba e posicion financiero di nos isla. Pero segun e parlamentario, esey tabata e manera di goberna di esnan cu ta sinta den oposicion awe. Nan a kere cu hende na Aruba ta bobo, pero esey no ta e caso y cada bes mas hende ta ripara e consecuencianan di e tipo di manehonan asina. Awo ta keda na e gobierno actual y e siguientenan te na 2044 pa soluciona e efectonan negativo laga atras pa e gobierno anterior. “Ta nos yiunan, nos nietonan y nos bisanietonan lo bay sigui carga e consecuencianan di e maneho desastroso di gobierno anterior”, segun Alan Howell.
Mas aleu el a trece dilanti cu e hunto cu su colega lider di Fraccion di POR, lo sostene un mocion pa realisa un investigacion riba e proyectonan aki pasobra den e rapport di Contraloria General, unico cu falta pa bisa ta cu ta un wega di gangster tabatin den nan. Ta importante pa gobierno haci su trabounan riba esaki pa por saca afo tur e interogantenan cu tin, incluyendo esunnan di parti di Contraloria General mes.
Finalisando, Alan Howell a bisa cu e ta considera cu e rapport ‘Bo Aruba’ lo mester tey na scolnan secundario rond Aruba pa nos hobennan por sa kico ta pasando na nos pais.
