Den conexion cu ‘’ConservationWeek2021’’, laga nos para keto un rato riba e beneficionan di planta un mata di fruta! Planta un mata di fruta no solamente ta amplia presencia di flora riba nos isla, e fruta tambe ta ofrece un fuente di cuminda pa parha, abeha y barbulet. Mientras e bestianan aki ta disfruta di nutricion, na mes momento nan ta transporta simia of stuifmeel di e mata. Asina bo mata por contribui na crecemento di mas mata na otro sitio, creando un rimpeleffect di no solamente mas cuminda pero tambe mas luga pa nos fauna por traha neishi y haya un sitio pa nan descansa.
Ayera durante World Nature Conservation Day nos rangernan a planta un mata di Macapruim riba tereno di Cunucu Arikok na Parke Nacional como simbolo di nos esfuerso continuo pa amplia y engrandece nos flora local mientras ta sostene nos biodiversidad. Specialmente nos Prikichi ta stima mata di Macapruim! Comparti den e seccion di comentario un potret di un mata den boso cura of bario cu tambe tin un gran contribucion na e salubridad di nos naturalesa.
Parke Nacional Arikok ta dedica na siman di conservacion di naturalesa
