Bin presencia e ultimo anochi gratis di Levi Silvanie su proyecto pa 2023
Conocido musico Curaçoleño Levi Silvanie a trese su proyecto The School Tour y The Album Experience listening sessions nos isla e siman aki, pa asina pueblo di Aruba por wordo inspira pa tene conbersashonnan habri tocante salud mental a traves di música. Awe diaranson di 7 pa 10 ‘or di anochi lo tin un Open Panel Discussion den cual lo tin expertonan ta tene dialogo tocante e topico importante aki. E session ta tuma lugar na JFK Education Center, pueblo henter ta bon bini pa registra.
Danki na e apoyo di Ministerio di Educashon y Deporte di Aruba, Ministerio di Husticia y Asuntonan Social, Departamento di Enseñansa, Gianni’s Group, Elite Productions, y otro partidonan, e prome etapa di e projecto aki por wordo realisa y sostene cu plannan grandi pa futuro.
Cu The School Tour y The Album Experience, Silvanie ta usa e poder di música pa inicia conbersashon habri tocante salud mental y cuido personal. Un experiencia inmersivo den cual e ta compartí su música y su storia, incluyendo dialogo abierto cu profesionalnan di cuido (mental) local. Papiando di obstaculonan diario y e diferente maneranan cu por mehora of mantene un estado mental saludabel. E siman aki casi 300 mucha di scolnan secundario Filomena College, Maria College y Colegio Arubano a atende e seshon nan ariba dialuna, diamars y awe diaranson mainta. Dialuna a tuma lugar un session pa hende homber y ayera un session pa educador.
Mental Health Panel Conversation
Clausurando e serie aki, awe diaranson 18 di oktober di 7pm pa 10pm, lo tuma lugar un Open Panel Discussion. E anochi aki pueblo henter ta bon bini pa registra pa asina atende y scucha un panel di diferente representante di partidonan clave cu lo discuti obstaculonan y solushonnan relata na Salud Mental na Aruba.
E Panel lo consisti di:
-Minister Rocco Tjon, representando Ministerio di Husticia y Asuntonan Social
-Dr H van Gaalen, representando Respaldo
-Parlamentario Sra Raymichelline Raymond
-Sra Maureen Kelly, representando Cliëntenraad Respaldo
-Sra Aldona Blijden, di parti AZV
-Sr Randall van Trigt di Stichting Hunto
-Sr Ru Croes, ex director di AZV, lo actua como moderador.
Porta ta sera 7:30pm.
E session ta tuma lugar na JFK Education Center, Stadionweg na Oranjestad. Participashon ta completamente gratis, pero registrashon ta necesario como cu tin 100 cupo so pa cada session. Pa mas informashon y e linknan pa registra, bishita https://www.facebook.com/LeviSilvanie
E projecto ta wordo hasi posibel cu sosten di Gobierno di Aruba.
