Palu di mangel saludabel ta aktua komo un depósito di karbon, nan tin e abilidat di almasená òf warda un variedat di gas di greenhouse den nan sistema manera den mangasina. Ora ku e salubridat di palu di mangel baha nan ta pèrdè e abilidat akí, pero ainda no ta konosí te kon leu esaki ta e kaso. Un estudio di e Palu di Mangel nan di Boneiru na 2019 a trata di analisá e diferensia entre e abilidat pa almasená karbon entre palu di mangel saludabel i palu di mangel ku nan salubridat a bai atras. E estudio akí a prueba ku mantenshon di áreanan akuátiko ta krusial den kombatimentu di kambio di klima.
Gasnan di greenhouse, manera karbon dióksido (CO2) i métano (CH4), ta hunga un papel importante den aselerashon di kentamentu global, empeorashon di e sirkunstansianan di kambio di klima. Ora ku kosnan den naturalesa ta den balansa, ta eksistí sistemanan di medio ambiente ku por kapturá e gasnan di greenhouse di manera ku ta yega na un ekilibrio. Áreanan akuátiko ta sirbi komo un ehèmpel perfekto di áreanan kaminda komunidatnan di mata produktivo por almasená i usa kantidat grandi di karbon pa medio di proseso di deskomposishon i fotosíntesis.
Karbon Blou
Karbon ku ta almasená denter di e medioambiente na kosta ta konosí bou di e nòmber “karbon blou” i esaki a bira esensial den kreashon di fleksibilidat pa kambio di klima pa por sigui pa dilanti. Di e áreanan di karbon blou akí, palu di mangel ta bou di e ekosistemanan na mundu ku ta kontené mas tantu karbon. Ta kalkulá ku dor di nan shelu diki di foyo i sistema di rais kompleho, nan por almasená karbon na un grado di 50 biaha mas haltu ku selvanan tropikal.
Lamentablemente, ta áreanan ku ta bou di menasa. Kálkulonan resien a saka afó ku a rosa kasi un terser parti di e selvanan akí pa desaroyo di zona di kosta i pa krea mas tereno. Den Karibe so kaba, 24% di área di palu di mangel a bai pèrdí entre 1980 ku 2005. Ora ku e áreanan akí ta destruí, nos ta pèrdè no solamente e benefisionan di futuro almasenahe di karbon, pero nos ta kuminsá manda karbon den atmósfera ku anteriormente tabata mará den e sedimento ku e palunan tabata kapturá.
Sientífikonan a kaba di kuminsá komprendé e importansia di e ekosistemanan akí. A kuminsá konsipiá plannan di maneho nobo pa propagá e áreanan akí komo sitionan importante komo mangasina pa karbon i outornan di plan di maneho ta trahando riba formanan pa inkorporá e konseptonan akí den strategianan pa moderá kambio di klima. Apesar ku a hasi estudio kaba di e diferensianan entre mondi di palu di mangel saludabel ku mondi di palu di mangel ku a rosa benta bou, ainda tin skarsedat di informashon tokante mondinan ku gradualmente ta deteriorá. E deterioro poko poko, en general ta resultado di deterioro di e sirkunstansianan di medio ambiente, ku ta kousa ku gradualmente palunan ta bira ménos. Si e sirkunstansianan di klima ta sigui bira severo, por spera ku e mondinan di palu di mangel ku a sobra, por drenta den un kresementu gradual di bira ménos. Pues komprendementu di kon esaki tin impakto riba nan abilidat pa funshoná komo mangasina di karbon lo bira esensial.
Bahia di Lac
Esaki ta e kaso na Boneiru, unda e mondinan di palu di mangel na rant di Bahia di Lac pa dékadanan kaba ta den un bahada gradual. Un estudio resien ku Universidat di Bremen i e Sentro di Investigashon pa Laman Tropikal di Leibniz a hasi, tabatin e meta komprendé e diferensianan dor di kuantifiká e kapasidat di almasená karbon na áreanan di palu di mangel saludabel i di áreanan di palu di mangel ku ta deteriorá gradualmente.
E área ku a investigá tabatin hopi fluho di sedimento ora di áwaseru, komo ku ekseso di komementu di vegetashon i desaroyo urbano a kita vegetashon abou na tera ku normalmente lo a minimalisá eroshon. E fluho haltu di sedimento ora di áwaseru, a kousa yenamentu di tera den e área di mondi di palu di mangel, loke ta minimalisá e sirkulashon di awa i ta krea áreanan ku stagnashon di koriente di awa i ta krea awa ku tin un nivel hopi haltu di salu. E sirkunstansianan akí a kondusí na e redukshon gradual di palu di mangel. E presensia di palu di mangel saludabel i palu di mangel den deterioro den mesun mondi, a hasi Boneiru e sitio perfekto pa hasi estudio di e diferensianan den e medio ambientenan akí pa komprendé mihó e dinamismo di karbon den e áreanan akí.
E Estudio
A hasi midimentu entre yanüari ku mart di 2019. A selektá 17 núkleo di palu di mangel saludabel i 15 núkleo di palu di mangel den deterioro. Na final, a haña un diferensia palpabel entre e dos áreanan akí. A bin dilanti ku palu di mangel den áreanan saludabel i intakto tabatin kantidat mas grandi di material biológiko riba tera (blachi, rama, tronkon) i den tera (rais, sedimento) ku esunnan den e áreanan den deterioro. E áreanan den deterioro tabatin masha tiki material biológiko riba tera, ku ta resultá den ménos fotosíntesis, ménos sedimentashon i mas eroshon, proseso di eroshon kousá pa áwaseru ku grado mas haltu di ásido i nivelnan mas haltu di deskomposishon den e sedimento. E pèrdida kompleto akí di e abilidat di depositá karbon den e kapa di riba tera i eroshon di sedimento ta nifiká ku no por konsiderá e áreanan akí mas komo depósito di karbon, pero en realidat ta aktua mas komo un fuente di produsí karbon, dunando oportunidat pa karbon ku ta almasená kaba, drenta atrobe den atmósfera i awanan bisiña.
E futuro di Palu di Mangelnan
Interesante ta, ku e estudio akí a saka afó ku e karbon ku e áreanan den deterioro gradual ta laga sali, ta tuma lugá den un spit mas poko poko ku esun ku e mondinan ku intenshonalmente a rosa i kita, ta laga sali. Esaki por ta importante pa plannan pa moderá kambio di klima komo ku sientífikonan ta kere ku kambio di klima lo oumentá e áreanan árido den parti di e region di Karibe, Amérika Sentral ku Sùit Amérika i Sùit Asia, tresiendo kambio den prosesonan hidrológiko i kousando temporada di nivel di awa hopi salu, ku lo kousa redukshon gradual di kantidat grandi di e mondinan ku a sobra. Komprendementu di e diferensianan akí lo bira esensial den pronóstiko di e abilidat pa áreanan natural fungi komo depósito di karbon den futuro. E estudio akí a prueba ku palu di mangelnan ku gradualmente ta deteriorá no ta funshonando mas komo depósito i ku mester hasi esfuerso pa mantené e mondinan ku a sobra intakto i saludabel si nos ke logra haña mas solushon natural pa minimalisá nos spornan di karbon.
