Paisnan I lidernan den Amerika Latina I Karibe ku delegashon di Bonaire Human Rights a bishita den 2022 I 2023

Djaluna 21 di ougùstùs 2023, part’i mainta, na Captain Don’s Habitat, Bonaire Human Rights (BHRO) su miembronan Davika Bissessar, James Finies i Sedney Marten, a organisá un konferensia di prensa i mainta di informashon pa prensa i organisashonnan gubernamental i no-gubernamental. Durante e mainta a duna informashon tokante e 495 dianan den Latino Amérika, Área Karibe i Nashonnan Uní, nan bishita ofisial i reunionnan kaminda a presentá e ‘kaso di Boneiru’ i e rapòrt di Evaluashon di Propio-Gobernashon na gobièrnunan, ministerionan, institushonnan gubernamental i no-gubernamental i  universidatnan. E promé fase di e pelgrimahe a start dia 16 di febrüari 2022, na momentu ku e delegashon a sali di Boneiru bai Merka i despues sigui pa México kaminda tabatin reunionnan ofisial ku organisashonnan gubernamental i no-gubernamental i a partisipá den e di 93 aniversario di e Partido mas grandi di México PRI, komo invitado di honor. Despues a sigui pa Belize, ku un delegashon di México, Boneiru i Aruba i a tene reunionnan ku e Promé Minister Johnny Briceno i Minister di Relashonnan di Eksterior Courteney huntu ku otro miembronan di Relashonnan di Eksterior. Despues a regresá México ku mas reunionnan ku gobernantenan di México. Di einan nos a sigui pa Honduras, Guatemala, Panamá i durante transkurso di 11 luna BHRO a reuní ku ofisialnan di gobièrnunan di Chile, Perú, Argentina, Brasil, Paraguay, Uruguay, Bolivia, Venezuela, Colombia, El Salvador i Costa Rica. Kuminsamentu di yüli 2022 nos a biaha pa Sürnam ku un delegashon di México kaminda nos a partisipá na e di 43 Konferensia di CARICOM di Hefenan di Gobièrnu. Na Paramaribo nos tabatin enkuentro ku lidernan i promé ministernan di tur a paisnan di CARICOM. Despues di Sürnam nos a regresá Merka i tabatin reunionnan na Washington i New York ku embahadornan di Bolivia, Venezuela, Sto. Domingo i Nicaragua. Despues nos a bishitá Guyana i nos tabatin diskushonnan na e Ministerio di Relashonnan di Eksterior ku e aktual i anterior presidentenan di Guyana. Nos delegashon a kontinuá pa Barbados, kaminda nos a partisipá den konferensia internashonal di Global African Congress i a hasi presentashon riba Dekolonisashon den Karibe. Despues nos a sigui pa St. Vincent i Grenadines, Union Island, Canouan, Bequia, Carriacou i Grenada. Dia 14 di desèmber 2022 nos a regresá Boneiru pa pasa e dianan di fiesta di Pasku ku nos famia. Dia 18 di yanüari 2023 nos a sali, riba e siguiente fase, pa Aruba i despues sigui pa Panamá, kaminda nos tabatin reunionnan ku e Minister di Relashonnan di Eksterior Janaina Tewaney i e Gabinete di gobièrnu di Panamá. Despues, riba invitashon di e Instituto Kubano di Amistat ku Pueblonan (ICAP), nos delegashon a kontinuá pa Cuba pa partisipá na e di 5 Konferensia Internashonal Pa Ekilibrio di Mundo – Konferensia di Pas, kaminda mas ku 100 pais i 1000 delegado for di tur parti di mundu a partisipá. Na Cuba tambe nos tabatin e oportunidat di presentá e Evaluashon di Propio-Gobernashon di Boneiru na e presidente di Cuba, Miguel Diaz-Canel. Na aprel 2023, komo rekonosementu pa e kontribushonnan signifikante di abogasia di derechonan humano, Komishon di Reparashon di CARICOM a otorgá na BHRO e Miembresia Asosiá di CARICOM. Na mei nos a haña invitashon pa bai Sede di Nashonnan Uní na New York, kaminda BHRO a haña e Status Konsultativo Spesial di e Konseho Ekonómiko i Sosial di Nashonnan Uní (ECOSOC). Esaki ta e honor mas haltu ku un organisashon di sosiedat sivil por logra na mundu i e ta duna BHRO i sosiedat sivil di Boneiru akseso na Sedenan di Nashonnan Uní na New York, Geneve i Vienna. Un momentu históriko pa Boneiru i e islanan di anterior Antia Hulandes tabata riba 31 di mei 2023, ora James Finies a duna un diskurso den e Foro Permanente di Pueblonan di Desendensia Afrikano na Nashonnan Uní, ku mas di 900 partisipante di tur parti di mundu i paisnan miembro di Nashonnan Uní. A transmití e diskurso akí bibu pa rònt mundu via UNTV.  

Nos a regresá pa Karibe Oeste, pa St. Lucia i Dominica, kaminda nos tabatin reunionnan ku e Organisashon di Estadonan di Karibe Oeste (OECS) i promé ministernan i ministernan di relashonnan di eksterior. Tambe nos a partisipá na e di 47 Konferensia anual di Caribbean Studies Association na Ay Ay St. Croix, Islanan Vírgen i a risibí galardon pa e abogasia ekstraordinario den defensa di derechonan humano di e pueblo boneriano i pueblonan di Karibe. Despues nos a bai St. Thomas i sigui pa Nevis i St. Kitts pa presensiá e di 73 Konferensia di e Outoridat di Estadonan di Karibe Oeste, kaminda nos tabatin enkuentro ku lidernan i promé ministernan di e paisnan di Karibe Oeste. Di Karibe Oeste nos a regresá Nashonnan Uní na New York i tabatin reunion di nivel haltu den preparashon pa e ponementu di Boneiru bèk riba e Lista di Teritorionan-Sin-Propio-Gobernashon. Dikon e biahenan? E biahenan ta pa konsientisá paisnan miembro di Nashonnan Uní tokante e kaso di Boneiru, presentando e Evaluashon di Propio Gobernashon di Boneiru na lidernan den region i den Karibe, pa sostené Boneiru na Asamblea General di Nashonnan Uní i logra pone Boneiru bèk riba lista di Teritorionan-Sin-Propio-Gobernashon.  Dikon Boneiru mester ta riba lista di Teritorionan-Sin-Propio-Gobernashon? Pasobra ora Boneiru ta riba e lista di Teritorionan-Sin-Propio-Gobernashon e boneriano ta haña protekshon di Nashonnan Uní meskos ku ta protehá turtuga, flamingo, karkó, refnan, raton di anochi, palu di mangel etc. Anto gobièrnu Hulandes tin obligashon di reportá tur aña na Nashonnan Uní, ku estadístika (dokumentashon) tokante nos desaroyo ekonómiko, sosial, polítiko, edukashonal i kultural.

Nos delegashon a bolbe kas bèk na fin di yüli 2023, pa sosegá i rekuperá anto nos lo regresá Nashonnan Uní dentro di dos siman pa atendé reunionnan di nivel haltu.